Көрер жарығы бар екен: Сел алып кеткен оқушы қызды іздеп тапқан инспектор мән-жайды баяндады

Шарындағы сел алып кеткен 11 жастағы қызды таңғы 7.50-де «Шарын» Ұлттық паркінің қызметкерлері инспектор Ермек Өмішов, гид-экскурсовод Ернар Жүнісов, бақылаушы Ербол Сатымбаев іздеп тапты, деп хабарлайды Almaty.tv.

Кейін олар ТЖ қызметкерлерін шақырып, оларға бағыт көрсеткен. Almaty.tv  тілшісі «Шарын» Ұлттық паркінің қызметкері, инспектор Ермек Өмішовпен тілдесті.

Ермек Өмішовтің айтуынша, Шарын шатқалында сел жүргені жайлы ақпарат кешке  16.00 шамасында түскен. Ұлттық парк қызметкерлері бірден іздеуге кіріскен. Іздеу жұмыстары түнгі сағат 00.00-ге жалғасқан.  Алайда қараңғы түсіп кетуіне байланысты іздеу жұмыстарында ешқандай нәтиже болмаған.

«Кеше сағат 16.00 шамасында Шарында сел жүрді, қыз бала жоғалды деген хабар келді. Бірден іздестіру жұмыстарын жүргіздік. Қараңғы түсіп кетуіне байланысты іздеу жұмыстарына нәтиже болмады. Іздестіру жұмысы тоқтатылды. Таңғы 05.00-де сол жерде болдық. Өзен жағасында отырған қызды тауып алдық. Су жағалап келе жатқанда, қарсы беттен қыздың «Құтқарыңдар!» деген дауысын  естідік. Өзеннің қарсы бетінде отырғандықтан, бірден құтқара алмадық.  Тиісті органдарға хабарласып, төтеншеліктерді шақырдық. Олар келгенше, бақылап тұрдық», – дейді ол.  

11 жастағы қыз бала оқиға болған жерде, 1,5 шақырымдай төмен кеткен. Сел ағысы қатты Шарын өзеніне құйылған.  

«Шарын өзенінің ағысы қатты болды. Оған сел кеп құйылды. Қыздың көрер жарығы бар екен, құдай сақтады! Ит-құс та бар. Мұндай жағдайда тіру қалады дегенге сену қиын», – дейді Ермек Өмішов.

Естеріңізге сала кетейік, 29 мамырда Шарын шатқалында селден 2 адам қаза тауып, 6 адам зардап шеккен еді. Сонымен қатар, бүгін сел алып кеткен қыз табылған еді.