Иттің иесін жазалауды сұраймын – қаза болған оқушының әжесі

Ақтөбеде 12 жастағы оқушының өлімінен соң қозғалған қылмыстық іс жүргізіліп жатыр. Марқұм Мадияр Шәкіраттың әжесі ит иесін жазалауды сұрайды, деп хабарлайды Almaty.tv тілшісі.

Ақтөбе қаласы Есет батыр тұрғын үй алабында қайғылы оқиға болды. Полиция 12 жастағы Мадияр Шәкіраттың көп қан кетіп, дене жарақатынан қаза болғанын растады.

«Жас баланың көп қан жоғалту, бастың, дененің, қол мен аяқтың көптеген жарақат түріндегі зорлықпен өлу белгілері бар мәйтінің табылу дерегі бойынша қылмыстық іс тіркелді. Алдын ала болжам бойынша өлімнің себебі жануардың тістеуінен болуы мүмкін деп болжап отырмыз. Аталған фактіге қатысты бірқатар сот-медициналық сараптама тағайындалды. Қылмыстық іс тергелуде», – деді Ақтөбе облысы ПД жергілікті полиция қызметі басқармасының бастығы Ардана Саймағамбетов.

Айдың аманында немересінен айырылып қалған Рахима Балиева иттің иесін жазалауды сұрап отыр. Бұдан бөлек, иесіз қалған мақұлықтарды емін-еркін көшеде жүргізіп қойған облыс басшылығына өкпесі қара қазандай.

«Алланың салған ісіне әр пенде көнеді. Көнбеске амал жоқ. Бірақ немеремнің зәбір көріп, қиналып, ешкімнен көмек көрмей, екі көзі жәудіреп, қиындықпен өмірден озғанына ішім қан жылап тұр. Адамның жаны қадірсіз болғаны ма? Иттің жаны қымбат болып кетті ме? Ит атуға болмайда деген не сөз! Иттің иесін тауып, шара қолдануды сұраймын. Өзегімді өртейді, өкініш. Баланы құрылыс компаниясының күзетшісі тауып алып, полицияға хабар берген. Анасы мәйітханаға барды. Сау жері қалмаған», - деді марқұм оқушының әжесі Нағима Валиева.

Айтып өтейік, учаскелік полиция қызметкерлері ит-мысық атуға қарсы жаңа заң шықпас бұрын 900-ден астам айыппұл салған. Оның 600-ден астам айыппұлы иттің иесіне жазылды. Өзгесі жайылып, жолға шығып кеткен мал иесіне тиесілі.

«25 мамырдан бастап Ақтөбе қаласының ветеринария стансасы тұрғындар мен учаскелік полициядан арыз қабылдап, жұмыс істеді. Бүгінге дейін 274 ит-мысық ауланып, көзі жойылды. Бұл аз. Бұған дейін ит ату маусымында күніне 100 ит жойылса, осыдан-ақ айырмашылықты көруге болады. Ветеринарларға арыз түскенмен, жануар бір жерде тұрмайды. Кейде барып, таппай қалады. Жергілікті бюджеттен бұл жұмыстарға 42 миллион теңге бөлінді. Оны аулап, ұстауға рұқсат берсе, осы қаржы қолданылады. Заң бойынша бұл жұмысты 18 шілде күні бастауға болады», - деді облыс әкімінің орынбасары Жақсығали Иманқұлов.

Ақтөбе өңірлік коммуникациялар қызметінде өткен баспасөз мәслихатында облыс әкімінің орынбасары өз жауапкершілігіне қатысты сұраққа да жауап берді. Сондай-ақ облыс әкімі Оңдасын Оразалин мен облыстық ПД бастығы істі бақылауға алды. 

Біз осыған дейін "Зорлықпен өлтірген": Ақтөбеде 12 жастағы баланың денесі табылғаны туралы жазған болатынбыз.