Шымкенттегі жарылыстан перзентханада нәресте шетінеп кетті

Шымкент қаласындағы жарылыс кезінде перинаталдық орталықта бір нәресте шетінеп кетті, деп хабарлайды Almaty.tv тілшісі Sputnik Қазақстанға сілтеме жасап.

Облыстық денсаулық сақтау басқармасы ұсынған мәліметке сәйкес, Шымкенттегі облыстық 1 перинаталдық орталық жарылған жеке меншік дәріхананың дәл жанында орналасқан.

"Жарылыс кезінде орталықта 189 пациент және 65 қызметкер болған. Оқиға салдарынан перинаталдық орталықтың 1 қызметкері қаза тауып, 1 нәресте шетінеді. Баланың туғанына 18 тәулік, салмағы 790 грамм болған. Бұдан бөлек, 8 адам жарақат алды", - дейді басқарма мамандары.

Зардап шеккен адамдарды Түркістан облыстық клиникалық ауруханаға, Шымкент қалалық клиникалық ауруханасына, 2 қалалық ауруханаға жеткізді.

"Айта кетейік, жарылыс болған ғимарат "Межбольничная 138 аптека" ЖШС-іне тиесілі. Ғимараттың перинаталдық орталыққа қатысы жоқ", - делінген ресми ақпаратта.