Алматыда референдумды қоғамдық қолдау штабы құрылды

Референдумды қоғамдық қолдау жөніндегі қалалық штабтың құрамына ірі ұйымдардың 23 өкілі, ғалымдар, блогерлер мен журналистер, жастар мен ардагерлер қауымы енді, деп хабарлайды Almaty.tv.

Штаб мүшелері еңбек ұжымдарына, кәсіпорындарға барып, түсіндіру жұмыстарын жүргізеді, қала аудандарын аралайды. Бұл туралы баспасөз мәслихатында штаб басшысы  Қазақстан Республикасы Жоғары оқу орындары қауымдастығының басшысы Рахман Алшанов мәлім етті.

"Біздің мақсатымыз – жалпыхалықтық референдумды қолдау үшін қоғамдық пікір қалыптастыру. Алматы әрқашан ірі саяси оқиғалардың ошағы болып табылады. Қаламыз өте белсенді. Бүгін біз қоғамдық бірлестіктердің өкілдерімен жиналып, референдумды қолдайтын Қалалық штаб құруды ұсынып отырмыз",  – деді ҚР Жоғары оқу орындары қауымдастығының басшысы Рахман Алшанов.

Мемлекет басшысының Конституцияға өзгертулер мен толықтырулар енгізу туралы ұсынысын Алматы қаласы ҚХА Ғылыми-сарапшылық тобы төрағасының орынбасары Светлана Ананьева да қолдады. Оның пікірінше, Президент Қазақстан халқының бірлігіне үлкен мән береді.

"Ассамблея Қазақстан халқының мүддесіне қызмет етеді. Ең бастысы да осы. 5 маусымға белгіленген референдум Қазақстан дамуының аса маңызды бағыттары туралы қазақ қоғамының пікірін білдіруге бағытталған. Біз көпұлтты мемлекетпіз. Біз оны мақтан тұтамыз. Ендеше, Президентіміз атап көрсеткендей, біз этностарымыздың мәдениетінің алуан түрлілігін сақтауымыз керек", – деді спикер.

Естеріңізге сала кетейік, референдумның өз деңгейінде өтуіне оған қатысу үшін тізімге енгізілген қазақстандықтардың жартысынан көбі дауыс беруі керек. Дауыс беруге бір ғана сұрақ қойылады. Екі ықтимал жауап болады: «жақтаймын» немесе «қарсымын».

Референдумды қоғамдық қолдау штабы мүшелерінің пікірінше, Конституцияға енгізілген өзгерістер Үкімет халқына есеп беретін ықпалды Парламенттің, нағыз халықтық мәслихаттардың жұмыс істеуінің тиімді тетіктерін қамтамасыз етеді.  Олар ұсынылып отырған конституциялық реформа ережелері қабылданса  саяси плюрализм мен бәсекеге қабілетті демократиялық ортаның дамуы үшін барлық қажетті жағдайлар жасалатынына бек сенімді.

Қоғамдық штаб мүшелері барша қазақстандықтарды ортақ мақсат жолындағы бұл жалпыхалықтық шараға  ынта-жігермен,  белсенді азаматтық жауапкершілікпен жұмылып, республикалық референдумда дауыс беруге қатысуға шақырады.