Алматы тұрғындары референдумды қолдайды

15 наурыз күні Қазақстанда жаңа Конституция жобасы бойынша республикалық референдум өтеді. Алматы тұрғындары өз азаматтық ұстанымдарын белсенді түрде білдіріп, қала халқын дауыс беруге қатысуға шақыруда, деп хабарлайды Almaty.tv.

Алматылықтардың пікірінше, референдумға қатысу — бұл тек құқық қана емес, әрбір қазақстандықтың азаматтық міндеті.

Көпбалалы ана Айнаш Мақұлбекова елдің болашағы әр адамның таңдауына байланысты екенін атап өтті:

«Біз Қазақстан азаматтары ретінде еліміздің болашағы үшін дауыс беруге келуіміз керек. Кім “қолдайды”, кім “қарсы” болады — оны халық шешеді. Ең бастысы — қатысу. Біз мемлекеттің дамуына және балаларымыздың жарқын болашағына бағытталған өзгерістерді қолдаймыз», — деді ол.

Трамплиннен секіру жаттықтырушысы Павел Васильев те жеке жауапкершіліктің маңызын атап өтті:

«Мен міндетті түрде дауыс беруге барамын. Бұл — біздің таңдауымыз, біздің болашағымыз. Белсенді азаматтық ұстаным танытып, шет қалмау керек», — деді ол.

Зейнеткер Шолпан Сақыпова дауыс беру кезінде саналы көзқарастың маңызды екенін айтты:

«Референдум — ел үшін маңызды оқиға. Дауыс бермес бұрын Конституцияға ұсынылған өзгерістермен мұқият танысу қажет. Әр азамат өз азаматтық міндетін орындауы тиіс», — деді ол.

Ерікті Қымбат Нұрдәулет жастарды белсенді болуға шақырды:

«Бүгінде жас буынның қатысуы аса маңызды. Ертеңгі Қазақстанның қандай болатыны біздің ұстанымымызға байланысты», — деді ол.

Қала тұрғындарының айтуынша, алдағы референдум — тәуелсіз әрі еркін Қазақстанның дамуына үлес қосуға берілген мүмкіндік. Көптеген алматылықтар азаматтардың белсенді қатысуы арқылы ғана мықты әрі жауапты қоғам қалыптасатынына сенімді.

Оқи отырыңыз: Жастар белсенділікті таңдайды: Алматыда референдумды қолдауға арналған бастамалар басталды