Қазақ жігітіне тұрмысқа шыққан украиналық тележүргізуші махаббат дастаны қалай басталғанын айтып берді

Қазақстандықтар украиналық тележүргізуші Иванна Онуфрийчукты Алмаз есімді қазақ бизнесменіне тұрмысқа шыққаны туралы жаңалықтан кейін біле бастады. Олардың Мальдив аралдарындағы үйлену тойының әдемі суреттері әлеуметтік желілерде лезде тарады. 

Иванна Онуфрийчук Алмазбен қалай танысқанын, екеуінің махаббат дастанын баяндап берді, деп хабарлайды Almaty.tv тілшісі Tengrinews.kz сайтына сілтеме жасап. 

«Алмазмен 2,5 жыл бұрын таныстым. Мұны бір қарағаннан ғашық болу деп айтпас едім, өйткені қарым-қатынасымыз бастапқыда баяу дамыды. Бірақ Алмаз маған «сені бір көргеннен менің жарым болатыныңды түсіндім» деп айтқанды жақсы көреді.

Бұған дейін де алғаш кездесуіміз қалай болғанын бірнеше рет баяндағанмын, бірақ бұл оқиғаны жақсы көремін. Оны романтикалық фильмде көрсетуге келмес, бірақ қазір бізді көктегілер қосқанын түсінемін.

Мен жалғыз демалғанды жақсы көремін, бір ретте Испанияға детокс клиникаға бардым, онда ағзаны тазарту бағдарламасынан өттім. Алғашқы күндері тамақтан қиналдым, себебі оны кішігірім ыдыспен беретін, көбірек салғызу мүмкін емес. Бір күні шай ішуге мейрамханаға бардым, халатпен, шашымды жинап шыға салғанмын. Қарным аш. Шөптен жасалған шайымды ішіп отырсам бір тартымды жігіт кіріп келді, бәрі оны айналшықтап, менеджер оған қарбыз әкеп берді. Сол кезде Алмаз мені өзіне қарап отыр деп ойлаған шығар, бірақ ойым тек қарбызда болды.

Келесіде спортзалда кездестік, Алмаз көрші жолақта жаттығып тұрып, менімен танысты. Мен туралы сұрады, өзін Қазақстаннан екенін, биржада сауда-саттықпен айналысатынын айтты. Содан кейін топпен бірге Nordic walking тауларына баруға шақырды. Содан кейін ол менің телефон нөмірімді алып, Киевке барған кезде кездескісі келетінін айтты. Біз көп хат алмастық, сөйтсем маған «құпия жанкүйерлерден» келіп жүрген гүлшоқтары содан екен. Бірақ Алмаз ұзақ уақыт әрекет етпеді. Бір жылдай дос болып жүрдік», – деді украиналық тележүргізуші.

Иванна Онуфрийчук жұбайының шынымен қазақ екенін және Қазақстанға қашан баратынын айтты.

«Әрине, күйеуім – қазақ. Алмаз Швейцарияда бизнесін дамытып, сонда көшіп барды. Ол өте талантты адам. Кәсіпкер ретінде де, өз жұмысына белсенді қатысып, процестерді бақылап, дағдарыстарды басқаруы керек. Әрине, Алмаз Қазақстанға барып тұрады. Бірақ, коронавирус инфекциясы салдарынан бәрі күрделеніп кетті. Сондықтан нақты бір нәрсені жоспарлау өте қиын. Келесі жолы Алмаз Қазақстанға мені алып барады деп ойлаймын», – деді ол.