Бейжің-2022: Алау эстафетасы басталды

Қытай астанасы Бейжіңде Олимпиада алауының эстафетасы басталды деп хабарлайды Almaty.tv тілшісі Olympic.kz-ке сілтеме жасап.

Салтанатты рәсім Бейжіңнің солтүстігіндегі Олимпиадалық саябақтан бастау алды. Алау эстафетасын ресми түрде Қытай мемлекеттік кеңесінің бірінші вице-премьері Хань Чжэн ашты.

Ғаламдық пандемияға байланысты эстафетаның бағыты мен ұзақтығы біршама қысқарды. Коронавирус инфекциясының алдын алу мақсатында эстафетаға көрермендер қатыспайды. Одан бөлек, алауды адамдар тұратын көшелер мен аудандардан алыс жерлерде алып жүру көзделген.

Эстафета үш олимпиадалық кластердегі 12 кезеңнен тұрады. Алауды алып жүруге 14 пен 86 жас аралығындағы жалпы есебі 1200 алау ұстаушы қатысады. Сондай-ақ тарихта алғаш рет алауды адамдар ғана емес, машиналар да алып жүрмек.