Қазақстандық альпинистер әлем чемпионатында 1 орын алды

Халықаралық спорттық альпинизм Федерациясы (ISMA) 2022 жылғы биіктікке көтерілу класындағы альпинизм бойынша әлем чемпионатын қорытындылады. Бірінші орынды қиындығы бойынша 6Б солтүстік-батыс жартасымен Верный шыңына (5 250м) алғашқы болып өткен Қазақстан құрама командасы иеленді, деп хабарлайды Almaty.tv тілшісі Алматы қаласының туризм басқармасына сілтеме жасап.

Қазақстандық команданың құрамында Роман Шестернин, Леонид Крупа, Закиржан Абдураимов және Станислав Лайнопуло болды. Команданы спорт шебері Максим Тен басқарды. Жаттықтырушылар–спорт шеберлері Артем Скопин және Вячеслав Титов. Барлық бағыттың ұзындығы– 1670 м, биіктік айырмашылығы 910 м. Команда бағыт бойынша 6 түн арнайы платформада түнеді.

«Біз жетінші күні ашық аспан астында алғаш рет платформасыз шыңға көтерілдік. Қатты жел мен аязға қарамастан мен өзімді жақсы сезіндім», – деді альпинист Леонид Крупа.

Шыңға өрлеушілердің айтуынша, Верный шыңының солтүстік-батыс беткейі көтерілу барысында үлкен қызығушылық тудырады. Өйткені, бағыттың басты ерекшелігі қабырғалар тік, ал кейбір жерлері еңіс.

Анықтама:

Шың басқа альпинистік аудандарға қарағанда әлдеқайда аз зерттелген, Қызыл-Әскер шыңы ауданында (5842 м), Орталық Тянь-Шань, Батыс Көкшаал-Тоо жотасында орналасқан. Аудан тұрақсыз ауа-райымен сипатталады, ол күніне бірнеше рет «күн-қар-боран-күн» болып өзгереді. Верный шыңы, 5250 м. Кафедралды Собор, Минск шыңы, «Тянь-Шань Пети-Дрю» деп аталады және үлкен ішкі бұрышы бар қара гранит түрінен тұратын үлкен қабырға.