Алматылық спортшылар Азия ойындарында Қазақстан қоржынын жүлдемен толтыруды жалғастырып жатыр

Жапонияда өтіп жатқан XX жазғы Азия ойындарында алматылық спортшылар ұлттық құрама сапында жүлде алуды жалғастырып жатыр. Кезекті күміс медальдарды Кристина Морозова, Милад Карими және Татьяна Токарницкая жеңіп алды. Бұл туралы Алматы қаласы Спорт басқармасының өкілдері айтты, деп хабарлайды Almaty.tv тілшісі.  

Жеңіл атлетикадан Кристина Морозова жартылай марафон қашықтығындағы спорттық жүрісте 1:35:25 нәтижесін көрсетіп, екінші орын иеленді. Оның күміс жүлдесі Қазақстанның әйелдер арасындағы спорттық жүріс тарихында ерекше нәтиже болды — Морозова осы дисциплинада Азия ойындарының күміс медалін жеңіп алған алғашқы қазақстандық спортшы атанды.

Спорттық гимнастикадан Милад Карими ерлер арасындағы еркін жаттығулар финалында 14,600 ұпай жинап, екінші орынға ие болды. Қазақстан Азия ойындарында бұл бағдарлама бойынша 32 жылдан кейін алғаш рет күміс медаль жеңіп алды. Бұған дейін дәл осындай жүлдені 1994 жылы Сергей Федорченко иеленген.

Тағы бір күміс жүлдені Татьяна Токарницкая жеңіп алды. Байдаркамен ескек есуден әйелдер арасындағы 500 метрлік қоссайыста ол Ольга Шмелёвамен бірге 1:48,140 нәтижесімен мәреге екінші болып жетті.

Бұл жүлделер алматылық спортшылардың Азия ойындарындағы сәтті өнерін жалғастырды. Бұған дейін Алматы өкілдері қазіргі бессайыстан командалық жарыста және каратэден қола медаль жеңіп алған еді.

XX жазғы Азия ойындары 4 қазанға дейін жалғасады. Алда Қазақстан құрамасы сапындағы алматылық спортшылар спорттың өзге түрлерінен де сынға түседі.