Қазақстандық боксшы әрі файтер Ташкентте нокаутпен жеңіске жетті

Қазақстандық файтер Еркебұлан Тоқтар кәсіпқой бокстағы екінші жекпе-жегін өткізді, деп хабарлайды Аlmaty.tv тілшісі Prosports.kz-ке сілтеме жасап.

Жекпе-жек Өзбекстанның Ташкент қаласындағы бокс кешінде өтті. Тоқтардың қарсыласы өзбекстандық боксшы Тимур Никулин (9-1-2, 4 КО) болды. Екінші орта салмақтағы айқас алты раундқа жоспарланғанымен, алғашқы минуттарда-ақ аяқталды.

Еркебұлан жекпе-жекті сенімді бастады да, Никулинді нокдаунға жіберді. Жекпе-жек жалғасқаннан кейін қазақстандық боксшы шабуылын үдете түсті, нәтижесінде төреші жекпе-жекті тоқтатып, бірінші раундтың 72-секундында техникалық нокаут тіркеді.

Осылайша, Тоқтар кәсіпқой рингтегі екінші жеңісіне жетіп, өзінің рекордын 2-0, 1 КО көрсеткішіне дейін жақсартты. Ал Никулин үшін бұл мансабындағы екінші жеңіліс болды.

Айта кетейік, Еркебұлан Тоқтар аралас жекпе-жекте де өнер көрсетеді, онда оның рекорды 11-3. Сонымен қатар ол күнделікті өмірде актер ретінде танымал.

Оқи отырыңыз: Дмитрий Панарин Бангладеште өткен турнирде алтын медаль жеңіп алды