Алматыда тарихи ЧЛ матчы өтті: «Қайрат» пен «Реал Мадрид» қалаға мереке сыйлады

Бүгін Алматының Орталық стадионында УЕФА Чемпиондар лигасы аясында «Қайрат» пен «Реал Мадрид» клубтары кездесті., деп хабарлайды Almaty.tv.

Ойын 5:0 есебімен мадридтік команданың пайдасына аяқталды. Стадион трибунасынан 23 мыңға жуық жанкүйер тамашалады.

Бұл матч шетелде де қызығушылық тудырды: Алматыға 5 мыңнан аса шетелдік турист келді. Негізгі ағын Қытай, Ресей, Испания, Жапония, Ұлыбритания, Чехия сияқты елдерден келді.

Қауіпсіздікті қамтамасыз етуге 2,5 мыңнан аса полицей жұмылдырылды. Сонымен қатар, Алматы гарнизонынан шамамен 50 әскери қызметкер кезекшілік етті. Ал жедел жәрдем мен білікті дәрігерлер медициналық қызмет көрсетті.

Жанкүйерлердің ыңғайы үшін метрополитен жұмысы түнгі 01:00-ге дейін ұзартылды (әдетте 00:00-ге дейін). Сондай-ақ Орталық стадионнан алты бағыт бойынша 60 тегін автобус қатынап, жанкүйерлерді қалаға жеткізді.

«Қайрат» — «Реал Мадрид» ойыны тек спорттық шара емес, нағыз әлемдік футбол мерекесіне айналды. Алматы ұйымдастыру деңгейін де, қонақжайлығын да тағы бір мәрте көрсетті.

Оқи отырыңыз: Чемпиондар лигасы: «Қайрат» — «Реал Мадрид» кездесуі басталды