Қазақ-өзбек шекарасындағы кептелістің себебі неде

Түркістан облысындағы Қазақстан мен Өзбекстан шекарасында 100-ден аса жүк көлігі кептеліп тұр. Отандық және шетелдік жүргізушілердің ұзын-сонар кезекте тәуліктеп тұрғанына бірнеше ай болды, деп хабарлайды Almaty.tv тілшісі.

Бұл – Түркістан облысы «Қазығұрт» кеден бекетіндегі көрініс. Шақырымдап созылған кезекте Өзбекстанға бет алған жүк көлігінің жүргізушілері тұр. Жолда қалғандардың Қазақстаннан шыға алмай жатқанына бірнеше тәулік. Олардың айтуынша, кептеліс тек күндіз ғана жылжиды.

– Бұл жерде кешеден бері тұрмыз. Ең көп дегенде 200 метрге жылжыған шығармыз. Кезек күндіз аз-маз жылжиды. Ал кешке мүлдем жылжымайды. Себебі кешке тек ақша бергендерді өткізеді. Бізге де дәл солай істеуге болар еді, бірақ басқаларды сыйлау керек деген ойдамын, – дейді жүк көлігінің жүргізушісі Бақыт Жиенбаев.

– Қазақстаннан Өзбекстанға өту мұңға айналды. Бұл жерде не жуынатын, не тамақ ішетін жер жоқ. Тыныш демалып, ұйықтап, жуынып алуға болатындай тұрақ жасау қиын емес, – дейді тағы бір жүк көлігінің жүргізушісі Абдуборы Имамов.

Кедендегі кептеліс себебін жергілікті шекара мамандары түсіндіруге тырысты. Олардың айтуынша, бұл кезек «Қапланбек» бекеті жөндеуге жабылғанынан кейін басталған. Содан бері жолаушылар қалған үш бағытқа жол тартқан. Соның бірі - осы «Қазығұрт».

– Бұл қалыпты жағдай. Жүк көліктерінің қатары жыл санап артып барады. Мемлекеттік кірістер органдарымен қажетті іс-шаралар жасалып жатыр. Қазір қос тарап келісімге келіп, жұмыс қарқынын күшейтуде, – деді Мемлекеттік кірістер департаментінің бөлім басшысы Айдос Қадырбердиев.

Департамент өкілдері бұған дейін дәл осы Қазығұрт кеден бекетінен күніне тек 10 жүк көлігінің өтіп келгенін айтады. Қазір жұмыс күшейіп, тәулігіне 250-ге көбейген. Айта кетейік, кептеліс осыдан жарты жыл бұрын пайда болған. Ал «Қапланбектің» қашан ашылары әзірге белгісіз.

Назерке Үкібасова, Елдар Жунусқанов, «Алматы» телеарнасы