Үйсіз-күйсіз жүріп, байып кеткен австралиялық жігіт жетістікке қалай жеткенін әңгімелеп берді, деп жазды Sputnik.
Гарри Сандерс (Harry Sanders) 17 жасында баспанасыз қалады. Оның айтуынша, ең қиыны алғашқы түн болған, өйткені ол қайда барып, не істеу керектігін білмеді. Сандерс бастапқыда көпірдің астында ұйықтағанын еске алды.
«Бұл қауіпті еді, өйткені аумақ үйсіздердің арасында бөлініп қойған. Мен бұл туралы ештеңе білмедім және алғашқыда шытырман жағдайға жиі тап болдым», - дейді ол.
Жас жігіт бір жылдан астам уақытын далада өткізді. Бірақ ол өзінің ешқашан аш қалмағанын айтады.
«Әртүрлі мекемелерге барып, сатылмаған тауарлар қалды ма деп сұрайтынмын, көбісі маған қуана-қуана тамақ беретін», - деп еске алды ол.
Жас жігіт іздеу жүйесін оңтайландыру арқылы ақша таба бастады – ол мұны баспанасынан айырылмай тұрып үйренген екен. Фриланс (қашықтықтан жұмыс істеу – Sputnik) Сандерстің аяққа тұруына көмектесті. Қазір 21 жастағы кәсіпкердің бизнесі 1,5 миллион Австралия долларына (387,2 миллион теңге) бағаланып отыр. Шілдеде Сандерс Лондонда өз компаниясының кеңсесін ашты.
«Мен қазіргі жетістігіме үйсіз-күйсіз жүргенімнің арқасында жеттім», - деп санайды Сандерс.
Ол даладағы өмір оны есейткенін, қиындықтарға төзуге және қиын кездерде амал етуге үйреткеніне сенімді. Сонымен қатар, ол мақсатқа анағұрлым нық қадам басқан, өйткені сәтсіздікке ұрынуға болмайтынын түсінді.
