Еуропаны аномальды ыстық басты: мамыр айында температуралық рекордтар жаңарды

Еуропаның бірқатар елдерінде мамыр айы үшін аномальды ауа райы байқалуда. Францияның 20-дан астам қаласында бақылау тарихындағы ең жоғары көрсеткіштер тіркеліп үлгерді, Испанияның кейбір аудандарында температура 40°C-қа дейін жетті, ал Ұлыбританияда 1922 жылғы рекорд жаңарды, - деп хабарлайды BBC-ге сілтеме жасаған Almaty.tv.

Британдық Met Office метеоқызметі дүйсенбі күні Лондонның «Хитроу» әуежайында 33,5°C температура тіркелгенін хабарлады — бұл елдегі мамыр айы үшін жаңа абсолютті рекорд.

Бұған дейінгі 32,8°C рекорды 1922 жылғы 22 мамырда Лондонның Кэмден ауданында тіркелген болатын, ал елдің оңтүстік-шығысындағы Хоршэм, Танбридж-Уэллс қалаларында және Лондонның Риджентс-паркінде мұндай температура 1944 жылғы 29 мамырда да есепке алынған еді. Синоптиктер сейсенбі күні Ұлыбританияда ауа температурасы 35°C-қа дейін көтерілуі мүмкін екенін ескертеді. Өткен түнде Лондонда мамыр айындағы ең жоғары түнгі температураның алдын ала рекорды орнатылды — 19,4°C. Болжамдар бойынша, таяу күндері Ұлыбритания, Франция және Испанияда мамыр айының жүздеген жаңа рекордтары орнатылады. Көптеген аймақтарда ауа температурасы климаттық нормадан бірден 12–15 градусқа жоғары болып тұр.

Францияның Météo France қызметі бұл құбылысты «ерте басталған, ерекше және ұзаққа созылатын» аптап ыстық толқыны деп сипаттауда, ол тағы бірнеше күнге созылады деп күтілуде.

Оқи отырыңыз: Әлемнің түкпір-түкпірінен келген мұсылмандар Арафат тауына жиналуда