Лох-Несс құбыжығын іздеу: зерттеу аяқталды

Табиғат зерттеушісі әрі «Лох-Несс жобасының» негізін қалаушы Эдриан Шайн заманауи ғылымдағы ең ұзаққа созылған жұмбақтардың біріне нүкте қойды.

52 жыл бойы жүргізілген мақсатты зерттеулерден кейін 76 жастағы ғалым аты аңызға айналған Лох-Несс құбыжығы — Несси шын мәнінде жоқ екенін ашық түрде мәлімдеді, деп хабарлайды Almaty.tv.

Көпжылдық бақылаулар мен талдауларға негізделген қорытындысын Эдриан Шайн LADbible басылымына берген сұхбатында жариялады.

Ғалым Лох-Несс көлін жүйелі түрде зерттеуді 1973 жылы бастаған. Зерттеулердің шарықтау шегі 1987 жылға сәйкес келді — сол жылы құны бір миллион фунт стерлинг болатын ауқымды операция жүргізіліп, заманауи гидроакустикалық жабдықтар қолданылған.

Алайда бұл экспедиция да, одан кейінгілері де көл суларында ірі әрі белгісіз тіршілік иесінің бар екенін дәлелдейтін ешқандай айғақ таппады.

Уақыт өте келе натуралист атақты «көріністердің» басым бөлігіне қарапайым түсініктеме бар деген қорытындыға келген. Шайнның айтуынша, көп жағдайда құбыжықтың арқасы деп қабылданатын көп төмпешікті пішіндер — Каледон каналы арқылы жүретін кемелердің кильватерлік толқындары.

Ал Нессиға телінетін ұзын «мойын» тынық су бетінде топтасып отырған құстармен түсіндіріледі.

Сонымен қатар, ғалым экологиялық факторларға да назар аударады: Лох-Несс көлінің суы суық әрі онда ірі жыртқыштарды асырауға жететіндей балық қоры жеткіліксіз.

Шайн үшін шешуші сәттердің бірі — өзінің жеке тәжірибесі болған: ол бір кезде «құбыжықтың өркеші» деп ойлаған нысан кәдімгі су астындағы тас болып шыққан.

Көңіл көншітпейтін қорытындыға қарамастан, Эдриан Шайн ондаған жылға созылған ізденістерді зая кеткен еңбек деп санамайды. Оның айтуынша, бұл жұмыс оған зор ләззат сыйлаған және болашақта жаңа жаңалықтардың ашылуын жоққа шығармайды.

Дегенмен, бүгінгі таңда ғалым Нессины нақты тіршілік иесі емес, оптикалық иллюзиялар мен адам қиялының тоғысуынан туған әдемі әрі өміршең аңыз ретінде қарастырады.