Дүниежүзілік футбол мерекесі: Мексикада футболдан Әлем Чемпионаты басталды

Жылдың басты футбол турнирі — Футболдан әлем чемпионаты басталды, деп хабарлайды Аlmaty.tv.

Доп додасы 11 маусым мен 19 шілде аралығында өтеді. Бұл — тарихи біріншілік: Әлем чемпионаты алғаш рет кеңейтілген форматта ұйымдастырылып отыр. Оған 12 топқа бөлінген 48 құрама қатысады. Плей-офф кезеңі бірден 1/16 финалдан басталады, оған 32 команда жолдама алады — әр топтан үздік шыққан 2 команда және үшінші орын алғандардың арасынан ең үздік 8 құрама.

Турнирдің шымылдығын ашу мәртебесі А тобында Чехия және Оңтүстік Корея құрамаларымен бірге өнер көрсететін Мексика мен ОАР командаларына бұйырды.

Старттық ысқырыққа дейін жанкүйерлер ұмытылмас шоудың куәсі болды. Ашылу салтанатында әлемге әйгілі актриса Сальма Хайек пен аңызға айналған тенор Андреа Бочелли өнер көрсетті. Ал поп-дива Шакираның сахнаға шығуы нағыз сенсация болды — ол футболдан төрт бірдей әлем чемпионатында өнер көрсеткен тарихтағы алғашқы орындаушы ретінде абсолютті рекорд орнатты.

Ашылу матчы Мехикодағы атақты «Ацтека» стадионында өтіп жатыр. Мексика өз тарихында Әлем чемпионатын үшінші рет қабылдаған алғашқы ел атанды (бұл жолы АҚШ және Канадамен бірлесіп).

Айта кетерлігі, Мексика мен ОАР осыдан тура 16 жыл бұрын — 2010 жылдың 11 маусымында да Әлем чемпионатының ашылу матчында кездескен болатын. Йоханнесбургтегі ол ойын 1:1 есебімен тең аяқталған еді. Сол кезде де, қазір де Мексика құрамасының сапында қақпашы Гильермо Очоа бар. 40 жастағы аңызға айналған қақпашы өзінің алтыншы Әлем чемпионатына аттанып, тарихқа енді — бұған дейін мұндай нәтижеге тек Лионель Месси мен Криштиану Роналду ғана қол жеткізген.

Екі команда үшін де бұл турнир — жаңа тарих жазудың мүмкіндігі. ОАР құрамасы әлемдік біріншілікке 2010 жылдан бері алғаш рет оралды. Ал 1994-2018 жылдар аралығында қатарынан жеті рет 1/8 финалдан аса алмаған, ал төрт жыл бұрын тіпті топтан шыға алмай қалған мексикалықтар бұл жолы жанкүйерлерін қуантуды көздейді.

Оқи отырыіыз: Әлем чемпионаты: биыл футбол додасы АҚШ, Мексика және Канадада өтеді