Алматыдағы вакциналау қарқыны туралы ақпаратты Өңірлік коммуникациялар қызметінің баспасөз конференциясында қалалық Қоғамдық денсаулық басқармасының басшысы Нариман Табынбаев мәлімдеді, деп хабарлайды Almaty.tv тілшісі «Алматы ақшамы» басылымына сілтеме жасап.
Нариман Табынбаевтың айтуынша, олардың ведомствосы ВАК-тан Pfizer вакцинасын қолдану туралы нақты түсінік алды. Ол бүгінде Алматыда 137 егу пункті орналастырылғанын, олардың бәрінде вакциналау жүргізілетінін атап өтті.
«Үкімет бірінші кезеңде вакцинацияланатын үш басым топты анықтады. 12-18 жас аралығындағы балаларды, сондай-ақ жүкті және бала емізетін әйелдерді вакцинациялау үшін Pfizer препаратын әкелу жоспарлануда. Сонымен қатар, бұл вакцинаны мектептерге бару арқылы жүргізуге рұқсат етіледі. Қазіргі уақытта Алматыда осы жастағы вакцинациялауға жататын 174 600 бала бар. Бала емізетін әйелдер – шамамен 67 000, жүкті әйелдер – 20 500. Бізде бұл тізімдер бар. Вакцинация ерікті түрде және ата-аналардың келісімімен жүргізіледі», - деді Алматы ҚДБ басшысы.
Сонымен қатар, ведомствода вакцинаны сақтау бойынша нақты нұсқаулар бар. Н. Табынбаевтың айтуынша, Pfizer вакцинасы – 60-90 градус температурада сақталуы тиіс. Бұл әзірлеушілердің басты талабы.
«Ерітілгеннен кейін ампулаларды 2-8 градус температурада сақтауға болады. Препаратты жалпы алғанда 30 күнге дейін суық тізбекті сақтай отырып қолдануға болады, осы уақыт ішінде ол өзінің қасиеттерін сақтайды», - деп толықтырды Нариман Табынбаев.
Алматы ҚДБ басшысы бүгінде вакцинаның бірінші компонентін 983 267 адам алғанын, екінші компонентін 908 697 қала тұрғыны салдырғанын хабарлады. Ол коронавирусқа қарсы вакциналану денсаулыққа зиянды әрі соңы өлімге апаратын дерттен қорғанудың ең тиімді және жалғыз әдісі екенін атап өтті.
