Қазақстанда 136 мың адам ревакциналаудан өтті – Алексей Цой

Елімізде 136 мың адам ревакциналаудан өтті. Бұл туралы Үкімет отырысында Денсаулық сақтау министрі Алексей Цой айтты, деп хабарлайды Almaty.tv тілшісі.

Оның сөзінше, халықты коронавирусқа қарсы вакциналау жалғасуда. Екпенің 1-компонентімен 8,8 млн-нан астам адам егілген. Cоның нәтижесінде COVID-19-бен ауырғандар саны 3,1 есеге азайып отыр.

«Бүгінгі күні Comirnaty Pfizer вакцинасының бірінші компонентін 188 мың 906 адам салғызды. Оның 150 669-і – жасөспірім және 38 237-і жүкті және бала емізетін әйел. Екінші компонентпен 19 386 адам егілді. Вакциналау жалғасып жатыр. Жалпы, қауіпті дерт бойынша оптимистік сценарий қалыптасып отыр», – деді ҚР Денсаулық сақтау министрі Алексей Цой.

Бұл ретте Үкімет басшысы Асқар Мамин вакциналау және ревакциналау қарқынын күшейтуді тапсырды. Қазір инфекциялық ауруханалардағы төсек-орындар 23 пайызға, реанимациялық орындар 20 пайызға толық екен.