Сенат бала құқығын қорғауға арналған заңды мақұлдады

Бүгін Сенаттың жалпы отырысында «Бала құқықтары туралы конвенцияға хабарлар рәсіміне қатысты факультативтік хаттаманы ратификациялау туралы» Заңы мақұлданды, деп хабарлайды Almaty.tv тілшісі ҚазАқпаратқа сілтеме жасап.

Заңның негізгі мақсаты – 2011 жылғы 19 желтоқсанда БҰҰ Бас Ассамблеясы қабылдаған Бала құқықтары туралы конвенцияға хабарлар рәсіміне қатысты факультативтік хаттаманы ратификациялау. Факультативтік хаттама Қазақстан 1994 жылғы 8 маусымда ратификациялаған БҰҰ-ның Бала құқықтары туралы конвенциясына қосымша келісім ретінде саналады.

«Заңның міндеті – Бала құқықтары туралы конвенцияда бекітілген құқықтар бұзылған жағдайларда балалардың немесе олардың ата-аналарының (заңды өкілдерінің) жеке шағымын қарау тетіктерін белгілейтін хаттаманы ратификациялау. Хаттамаға сәйкес балалар немесе олардың өкілдері БҰҰ-ның Бала құқықтары жөніндегі комитетіне өз құқықтарының бұзылғандығы туралы шағымдарды тікелей бере алады. Ол өз кезегінде әрбір істі қарап, қатысушы мемлекеттерге нақты ұсынымдарды қамтитын шешімдер қабылдайды», - делінген Сенаттың Әлеуметтік-мәдени даму және ғылым комитетінің мәліметінде.

Осы құжатқа қол қою Қазақстанның бала құқықтарын қамтамасыз ету және балаларды құқықтық қорғау тетіктерін кеңейту жөніндегі міндеттемесін тағы да растайды.

Сенатор Талғат Жүнісовтің айтуынша, қаралып отырған хаттамаға сәйкес, егер балалар немесе олардың өкілдері Қазақстандағы барлық деңгейдегі соттармен қаралып, шыққан шешіммен келіспесе, Біріккен Ұлттар Ұйымының Бала құқықтары жөніндегі комитетіне өз құқықтарының бұзылуы туралы шағым түсіре алады. Факультативтік хаттама хабарламаларды қараудың екі рәсімін қарастырады, олар – жеке және мемлекетаралық хабарлама.

«Хабарламаны жабық отырыста қарағаннан кейін комитет өз ұсынымдарын тиісті тараптарға жолдайды. Мемлекет өз кезегінде Комитеттің ұсыныстарын қарауға және қажетті шараларды қабылдау міндетін алады», - деді депутат.

Бұл заң аясында бала құқықтарын қорғау деңгейін арттыру, Қазақстан Республикасының азаматтарына өздерінің экономикалық, әлеуметтік және мәдени мүдделерін халықаралық қорғау құқығын қамтамасыз ету ескерілген.