Алматы әкімдігі Жұбанов көшесін ұзарту жұмыстары қашан басталатынын айтты, деп хабарлайды Almaty.tv.
Әуезов ауданының тұрғындары қала әкімі Ерболат Досаевпен болған кездесуде Жұбанов көшесін ұзарту мәселесін сұрады.
"Қазір Жұбанов көшесін ұзартуға қатысты жобалау жұмыстары жүргізіліп жатыр. Биыл желтоқсан айында мемлекеттік сараптамадан өткізу жоспары бар. Егер бәрі ойдағыдай болса, келесі жылы құрылыс жұмыстарын бастаймыз. Бұл жоба іске асса, көше Әуезов және Наурызбай аудандарының аумағы арқылы өтіп, Сәбденов көшесінің бойымен өтеді. Көшенің ені 40 метр, яғни 4 жолақты жол болмақ. Алынуға жататын 180-ге жуық нысан бар", - деді Қалалық мобильділік басқармасының басшысы Ғани Мұрзаханов.
Қарахан мен Сәбденов көшелері жобаның бір бөлігі болуы мүмкін. Олар Жұбанов жолының бойында орналасқан. Жұбанов көшесінің жалпы ұзындығы 5,3 шақырым. Жобалаушылар құрылыс жұмыстарын 2030 жылға дейін аяқтауды ұсынып отыр.