Алматы әкімі Ерболат Досаев Жетісу ауданында жұмыс сапары барысында «Халық қатысатын бюджет» бағдарламасы аясында жүзеге асырылып жатқан Райымбек даңғылындағы жаяу жүргіншілер көпірінің жөндеу барысымен танысты, деп хабарлайды Аlmaty.tv.
Мегаполис басшысы көпірдің жабындысын, баспалдақтарын көріп, қала тұрғындары үшін құрылыстың қауіпсіздігін қамтамасыз етудің маңыздылығын атады.
Жалпы ұзындығы 50 метр болатын көпір құрылысы Жетісу және Алмалы ауданын жалғайды. Көпір 70-ші жылдары салынып, жүк вагондары үшін тұйық тұрақ ретінде қолданылған, кейін жаяу жүргіншілер жүре бастады.
Жетісу ауданының әкімі Гүлнәр Көкебаева «Халық қатысатын бюджет» жобасы аясында жақын маңдағы үйлердің тұрғындары өткелді жөндеуге бастамашы болғанын жеткізді. Көпірдің Райымбек даңғылында екенін ескерсек, бұл ұсынысты дауыс беру кезеңінде ауданның басқа тұрғындары да белсенді қолдаған.
Жөндеу жұмыстарын «Lux-stroy Group» ЖШС мердігерлік ұйымы биыл 1 қыркүйекте бастады, жоба құны 45 млн. теңге. Қазір қауіпті қоршау жаяу жүргіншілердің қауіпсіздігі үшін берік қоршауға ауыстырылды, рельстер сақталып, гүлзарлар үшін пайдаланылды. Жақын аумақты көгалдандыру аясында 9 туя мен 65 арша отырғызу көзделген. Жұмыс 2023 жылдың 1 қарашасында толық аяқталады.
Қала басшысы аудан тұрғындарына ыңғайлы болу үшін Бөкейханов көшесіне параллель жаяу жүргіншілер аймағын ұзартуды тапсырды. Бұл ретте, қауіпсіздік толық көлемде қамтамасыз етілуі тиіс, деп атап өтті Ерболат Досаев. Мегаполис басшысы аудан әкіміне жарықтандыруды жолға қоюды, жол төсемін ретке келтіріп, өткелді мүмкіндігі шектеулі жандарға ыңғайлауды тапсырды.
«Халық қатысатын бюджет» бағдарламасы бойынша биыл Жетісу ауданында 40 жоба жүзеге асырылып жатыр. Соның ішінде аулаларды, гүлзарлар мен саябақтарды абаттандыру және т.б. жобалар бар. Барлық жобаны биыл қазан айының соңына дейін аяқтау жоспарға енген.
Анықтама: Алматыда 2023 жылдың 13-23 қазан аралығында budget.open-almaty.kz порталы арқылы аудан әкімдіктері 2024 жылы жүзеге асыратын «Халық қатысатын бюджеттің» үздік жобалары үшін дауыс беру жалғасып жатыр. Тұрғындардан келіп түскен 2213 жобалық ұсыныс қарастырылады. Жетісу ауданында абаттандыру және дамыту бойынша бастаманы 84 тұрғын көтерген. Алматыда тұрақты тіркелген әрі кәмелетке толған тұрғындар дауыс беруге құқылы. Аудандық әкімдіктерден немесе Open Almaty әкімдігінің Қоғамдық қабылдау бөлімінен кеңес алуға болады.
Оқи отырыңыз: Алматыда қала маңына қатынайтын бағыт ашылады