Дамушы елдерде қарқын алған әлеуметтік кәсіпкерлік Қазақстанда да дамып келеді, деп хабарлайды Almaty.tv тілшісі.
Куляра Маненованың Әуезов ауданында орналасқан сұлулық салоны бар. Қоғамның әлеуметтік әлеуетін жақсартуға ниеттенген ол, 1 жыл бұрын «Еңбек» мемлекеттік бағдарламасының қысқа мерзімді курстары аясында шаштараз-стилист мамандығын иемденіп, әлеуметтік сұлулық салонын ашуды ұйғарған. Бүгінде бұл жерде мүгедектерге, оларды асыраушыларға және зейнеткерлерге тегін қызмет көрсетіледі. Сондай-ақ ол көпбалалы отбасы мен мүгедектігі бар балалардың асыраушыларын кәсіпке баулып отыр.
«Бизнес арқылы ашқан жоқпыз, көмек болсын деп аштық. Көмек болсын дегенде, тегін шаш қию, үйрету. Мысалға біреудің отбасында 7 бала болса, оның барлығына 500 теңгеден санағанда отбасы үшін қымбат болады. Ал мамасы үйреніп алса, өзінің балаларын және көршілері бар, шашын қиып, пайда табады деп ойлаймын», – деді әлеуметтік кәсіпкер Куляра Маненова.
Қазіргі таңда сұлулық салонында 10-ға жуық қызметкер жұмыс істейді. Ұжым – көпбалалы отбасы мүшелері, мүгедектігі бар баланы асыраушылар және колледж түлектерінен құралған. Олардың жалақысының 70 пайызын жұмыспен қамту орталығы өтейді.
«Көпбалалы анамын, 4 баланың анасымын. Осында салон ашылғанда бізді тегін оқытты.Сөйтіп 2 ай оқыдым. Сосын осында жұмысқа алды, жұмыс істеп жатырмын. Жұмыс керемет, Құдайға шүкір! Клиентіміз көп», – деді көпбалалы ана Айнұр Саршаева.
Жалпы әлеуметтік мәселені жақсартуға бағытталған кәсіп ашып, нәсіп көремін деген жандар «Атамекен» ҚР Ұлттық кәсіпкерлер палатасынан кез-келген мәселе бойынша кеңес алуға болады.
«Мүдектігі бар жандар, әлеуметтік кәсіпкерлікпен айналысатын кәсіпкерлер қызмет көрсету орталығында тегін қызмет түрін пайдала алады. Кез-келген мәселе бойынша заңнамалық сұрақтар туындайды. Сондықтан оларға тегін кеңес береміз. Құжатты тегін рәсімдеп береміз», – деді «Атамекен» ҰКП Наурызбай ауданы филиалының директоры Мақсат Сералы.
Бүгінге дейін аналарды жұмыспен қамтып жүрген кәсіпкердің ендігі мақсаты – қызметке көпбалалы әкелерді жұмылдыру. Оған қатысты жоспары да бар екен. Оның айтуынша, жұмыссыздықпен емес, жалқаулықпен күресу керек.
Қайрат Советбекұлы, Арсен Сандыбаев, Мақсат Күнібек, «Алматы» телеарнасы