Алматы мектептерінде жас мамандар қайырымдылық эстафетасын бастады

Эстафетаның мақсаты – мүмкіндігі шектеулі және аз қамтылған отбасыларға сый тарату

Алматы мектептерінде жас мамандар қайырымдылық эстафетасын бастады

Тәуелсіздіктің 30 жылдығы қарсаңында қайырымдылық жұмыстарына басты назар аудару керек. Президенттің Қазақстан халқына жолдауында айтылған бұл сөзі білім ошақтарындағы жас мамандардың игі іс бастауына түрткі болды. Наурызбай ауданында ұйымдастырылған «Алматы – қуаныш қаласы» эстафетасына Almaty.tv тілшісі Таңелі Есіркепова қатысып қайтқан болатын.

Наурызбай ауданында орналасқан №157 жалпы білім беретін орта мектеп «Алматы – қуаныш қаласы» атты эстафетаны бастап отыр. Эстафетаның мақсаты – мүмкіндігі шектеулі және аз қамтылған отбасыларға сый тарату.

Эстафетаны биыл ғана ұстаз атанған Анар Арынова ұсынып, қалған жас мұғалімдер тобы бірауыздан қолдаған. Олар аудандағы тұрмысы төмен 8 отбасыға азық-түлік салынған себеттерді өз қолымен дайындап, табыстады.

«Президентіміз Тәуелсіздіктің 30 жылдығы қарсаңында қайырымдылық шараларға назар аудару керек екенін айқындап өткен болатын. Акция ауданымыздың 9 мектебінде жалғасын табатын болады», – деді жас мұғалім Анар Арынова.

«Аудан бойынша ең бірінші болып біздің мектептің жас мамандары бастады. Бүгінгі болатын іс-шараға 8 отбасын шақырдық. Келесі болатын іс-шараларға орындарын ауыстырып, шақырып отырамыз», - деді №157 орта мектеп директорының тәрбие ісі жөніндегі орынбасары Бақжан Әбдіқадыр.

Білім ордасының осындай белсенді жастармен толығуы ұжым бірлігін арттырады дейді мектеп мұғалімдері. Игі бастама ата-аналар мен оқушыларға мерекелік көңіл күй сыйлады. Олар өз кезегінде жас мамандарға алғыстарын жеткізді.

«№157 мектепте 3 балам оқиды. Бізді елеп, құрметтеп, сыйлап жатқаны үшін осы мектептің биыл келіп жатқан жас мамандарына алғысым шексіз», - дейді ата-ана Маржан Түйебаева.

Эстафетаны бірден-ақ №188 мектеп-гимназиясы жалғастырып кетті. Жас мамандар мүмкіндігі шектеулі оқушыларға планшет сыйлап, азық-түлік түрінде көмек көрсетті.

Таңелі Есіркепова, Жасұлан Өмірзақов, «Алматы» телеарнасы

Біздің Telegram каналына жазылып, соңғы ақпаратты оқыңыз. Егер хабарлама жолдағыңыз келсе, WhatsApp мессенжеріне жазыңыз.
Новости партнеров
След. →
Прямой эфир