5 жасар бала дене жарақатынан аурухананың жансақтау бөлімінде көз жұмған.
Шымкентте Түркістан облыстық клиникалық ауруханасының жансақтау бөлімінде 5 жасар бала қайтыс болды, деп хабарлайды Sputnik Қазақстан.
Қалалық полиция департаментінің баспасөз хатшысы Әсем Сәденованың айтуынша, оқиға желтоқсанның 5-і күні кешке болған. Полиция департаментінің кезекші бөліміне облыстық аурухананың жансақтау бөліміне 5 жасар баланың ауыр хәлде түскені хабарланған.
Алғашында баланың әке-шешесі оның екі қабатты кереуеттен құлап түскенін айтқан. Десе де, сот-медициналық сараптаманың алдын-ала қорытындысы бойынша сәбидің дене жарақатынан қайтыс болғаны анықталды.
«Қазіргі таңда аталған жайт бойынша Қылмыстық кодекстің 106-бабы («Денсаулыққа қасақана ауыр зиян келтіру, кінәлі адамға дәрменсіз күйде екені көрінеу белгілі адамға қатысты, сол сияқты адамды ұрлаумен не кепілге алумен ұштасқан») бойынша қылмыстық іс қозғалып, тергеп-тексеру амалдары жүргізілуде», — деді Сәденова.
Полицияның хабарлауынша, баланың өліміне күдікті ретінде өгей әкесі ұсталып отыр.
