Түркиядағы пойыз апатынан қазақстандықтар зардап шеккен жоқ – Елшілік

Түркиядағы пойыз апатынан зардап шеккен Қазақстан азаматтары жоқ. Бұл туралы Қазақстанның Түркиядағы Елшілігінен мәлім етті, деп хабарлайды ҚазАқпарат.

Елшілік ақпаратына сәйкес, 2018 жылдың 13 желтоқсаны күні сағат таңғы 06:30-дар шамасында Анкара-Конья бағытында қатынайтын жүрдек пойыз Анкара қаласындағы Маршандиз стансасында апатқа ұшыраған.

«Түркия Республикасы Денсаулық сақтау министрлігінен алынған ақпаратқа сәйкес, апатта қаза болған 8 және жарақат алған 46 адамның арасында Қазақстан азаматтары жоқ. Қазақстанның Түркиядағы Елшілігі опат болғандардың отбасыларының қайғыларына ортақтасып, жаралылардың тез сауығып кетуін тілейді», - делінген хабарламада.

Айта кетсек, Анкара-Конья жолаушылар жүрдек пойызы Енимахалле ауданында Маршандиз стансасында жерасты жаяу өтпе жолына соқтығысқан.