|
Архив
21.12.2018 | 15:39

Жаңа жылға дайындық: Алматы ұлттық нақышта безендіріле бастады

Жаңа жылға дайындық: Алматы ұлттық нақышта безендіріле бастады

Алматыда қасиетті Тәуелсіздік мерекесінен кейін жаңажылдық шыршалардың шамы жағылды. Сондай-ақ, биыл алғаш рет Абай алаңында Аяз ата мен Ақшақардың этностильдегі резиденциясы пайда болды. Қалада мейрамға дайындық қалай жүріп жатыр? Нысандар қандай стильде безендірілуі тиіс?

Алматылық кәсіпкер Ерболат Хамитов қазақтың ұлы ақыны Абай атындағы көшені безендіру үшін өз қалтасынан қаржы шығарған. 28 жастағы жас жігіт мұны азаматтық борышым деп біледі. Бірнеше жыл қатарынан шетелде тұрған ол Алматыдағы безендірудің ерекше екенін айтады. Сондықтан белгіленген концепциядан таймай, безендіруді ұлттық нақышта жасапты. Кәсіпкер 10 қақпа мен қос жер өткелін жалт-жұлт еткен шамдармен көмкеріпті.

«Мен қаланы безіндіру үшін орнатқан қақпаны егер төбеден қарасаңыз шатыр не киіз үйге ұқсатасыз. Яғни, бұл халықтың әл-ауқатының жақсы екенін, елдегі татулық пен тұрақтылықты білдіреді. Өзім 5 жылдай Қытайда тұрғанмын. Олар Жаңа жылды 3 аптадай тойлайды. Неге бізге де көптің сүйікті мерекесін ерекше етіп өткізбеске деп ойлаймын. Қала тұрғындары мен қонақтарының көз қуанышы болса екен», – деді кәсіпкер Ерболат ХАМИТОВ.

Қала әкімдігі биыл үнемділікке баса мән беріп отыр. Олар былтыр қолданылған әшекей бұйымдарды осы жылы да кәдеге жаратыпты. Безендіру басталмас бұрын арнайы комиссия құрылып, заттарды тексерістен өткізіп шыққан. Қаланың көркі әсіресе, түнгі уақытта ерекше көз тартады деген алматылықтардың көңіл күйі ерекше.

Айта кетейік, былтыр Алматыда 75 көше Жаңа жылға арнайы безендірілсе, биыл сан 83-ке жеткен. Оған қайта жаңғырудан өткен көше мен даңғылдар кіріпті. Сондай-ақ, биыл 730 ағашқа жарық шамдары байланған. Оған қоса, қаладағы көпірлер, жер өткелдері де назардан тыс қалмайды.

«Алматы қаласында орналасқан 8 аудандық арнайы шыршалар және де қала әкімдігі тарапынан ұйымдастырылып жатқан арнайы орындар бекітілген. Ол Абай алаңы, Астана алаңы, Опера және балет театрының алды, «Атакент», Тұңғыш Президент саябағы және «Алматы арена», – деді Алматы қаласы Мәдениет және архивтер басқармасы басшысының орынбасары Данияр ӘЛИЕВ.

Дегенмен, мамандар безендіруді бүлдіріп жатқандар көп дейді. Биыл шамдарды ұрлап не болмаса сындыру жағдайлары жиі орын алған. Сондықтан барды бағалап, ортақ дүниеге жанашырлықпен қарауды сұрайды мәдениет басқармасының өкілдері.

Жадыра Омаржан, Нұржан Оразбеков, «Алматы» телеарнасы