Ақмола облысында Шоқан Уәлиханов атындағы кадет корпусының түлектеріне диплом табысталды

Ақмола облысының Щучинск қаласында Шоқан Уәлиханов атындағы кадет корпусының түлектеріне диплом табысталды. Биыл әскери оқу орнын 197 шәкірт бітірді. Оның ішінде 10-ы үздік тәмамдаса, алтауы «Алтын белгі» иеленді. Кәсіби сержанттарды қошеметтеу шарасына Қорғаныс министрлігінің өкілдері, түлектердің ата-аналары мен туған-туыстары қатысты.

«Сержант деген кім? Сержант деген солдаттың сарбазы, сардары, командирі. Сіздердің міндетіңіз соны тәрбиелеп, білім беріп, шыңдап, қамқор болу. Ата-аналарға айтарым міне сіздердің ұлдарыңыз кеше сарбаз болса, қанаты қаққан елбасының қырандары сапқа сай шыққаннан кейін әскерге келіп, командир аталады»,- деді Қазақстан Республикасы Қарулы күштерінің бас сержанты, Темірбек ХАЛЫҚОВ.

Дипломдарды тапсыру салтанатынан кейін дәстүр бойынша жауынгерлік тумен қоштасу салтанаты ұйымдастырылып, жас сержанттар вальс биледі.

«Кадет корпусының 19-шы түлектері ретінде бізге еліміздің Қарулы күштерінің 25 жылдығы мен мемлекеттік рәміздерінің 25 жылдығы, кадет корпусының 20 жылдығы сынды атаулы дата күндері бітіру бақыты бұйырды. Енді артылған сенімді ақтауға тырысамын»,- деді Шоқан Уәлиханов атындағы кадет корпусының түлегі, Айсұлтан БАЙСАРИН.