Алматыда гранатамен ұсталған жігітке сот үкім кесті

Былтыр күзде алматылықтардың түн ұйқысын төрт бөлген арнайы операция кезінде гранатамен ұсталған жігітке сот үкім кесті. Оқ өтпейтін көлікті қару-жараққа толтырып, тәртіп сақшыларына қарсылық білдірген Дәурен Әлеуханов 2 жыл 6 ай бас бостандығынан айырылды. Ол басқарған Land Cruiser  көлігі заңды тұлғаға тіркелсе де, қылмыс құралы болғандықтан мемлекет меншігіне өтетін болды. Ал тәркіленген «Ф-1» жауынгерлік жарылғыш заты, пышақ, автомат пен оқжатардың көзі жойылып, брон кеудеше Ішкі істер департаметіне қолданысқа берілмек. Сот бұл атышулы процесті қысқартылған формада қарап, бар-жоғы екі аптаның ішінде соңғы нүктесін қойды.

«Сот үкім етті. Әлеуханов Дәурен Тұрсыналыұлын ҚР ҚК 287-ші бабы 3 бөлігімен кінәлі деп тауып, оған осы бап бойынша 2 жыл 6 ай мерзімінде бас бостандығынан айыру жазасы тағайындалсын. ҚР ҚК 346-ші бабының 1-ші бөлігімен кінәлі деп танып, оған көлік жүргізу құқығынан 3 жылға айыра отырып, 300 сағат қоғамдық жұмысқа тартылсын», - деді Алматы қаласы №2 Бостандық аудандық сотының судьясы Жанат БЕКЖАНОВ.