Алматыда үш тілді жетік меңгерген гидтер жетіспейді

Алматыда кәсіби білікті, үш тілді жетік меңгерген гидтер жетіспейді. Қазір қалада ресми түрде туристерге қызмет ететін 50-ден аса жол көрсетуші маман ғана бар екен. Туризм саласының сарапшылары «мұндай үлкен мегаполиске бұл аздық етеді», - дейді. Онымен бірге, музейлерде аудио гид пен шетелдік қонақтарға  арналған автобуста да жоқ. Ал, қалада жұмыс істейтін 1700-ден аса тур агенттік пен 750-ге жуық оператордың қызметі ортақ жүйеге негізделмеген болып шықты. Бүгін қалалық қоғамдық кеңесте Алматының туризм әлеуетін арттыру мәселесі кеңінен талқыланды.

«Алматы шаралық туризмді дамытып жатыр. Әсіресе, қала күніне арналған 50-ден аса шараға қызығушы шетелдіктер көбейіп келеді. Бірақ алда тау-шаңғы, медицина туризмін дамыту жоспарда тұр. Біз енді Ресей, Қытай мен Үндістан, Ираннан туристтерді тартуды көздеп отырмыз. Мәселен, тек Ираннан келген қонақтар былтыр Алматыда 130 млн теңгенің қызметін қолданған», - деді Алматы қаласы туризм және сыртқы байланыстар басқармасының басшысы

Ерлан ЖАЙЛАУБАЙ.