Алматыда жатақханалардың бірінде өрт шығып, 230 адам эвакуацияланды, - деп хабарлайды Tengrinews.kz.
Сағат 23.16-да Алматы қалалық Төтенше жағдайлар департаментіндегі"101" пультіне Бостандық ауданы, Ғабдуллин көшесі, 2-үйде өрт шыққаны жайлы хабар келген.
"Өрт сөндірушілер оқиға орнына 6 минуттан соң барды, сағат 23.22-де. Төртінші жатақхананың 3-қабатындағы бөлмелердің бірі өртеніп жатқаны анықталды. 230 адам эвакуацияланды", - деп хабарлады қалалық ТЖД ресми өкілі Сандуғаш Баймұхамбетова.
Айта кетейік, тілсіз жауды ауыздықтауға жатақхана қызметкерлері өрт сөндіру крандарын қолданған. Қызыл жалын 18 шаршы метрді шарпыған.