2021 жылдан бастап елімізде жеке куәліктерді латын қарпімен беру көзделуде

2021 жылдан бастап қазақстандықтардың жеке куәліктері мен басқа да құжаттарын латын графикасы негізінде мемлекеттік тілде беру көзделіп отыр. Бұл туралы Мәдениет және спорт вице-министрі Ерлан Қожағапанов айтты. Министр орынбасарының айтуынша, латын әліпбиіне көшудің бірінші кезеңі 2018-2020 жылдарға жоспарланған. Осы уақыт аралағында латын графикасы негізінде жаңа қазақ әліпбиінде дұрыс жазу қағидалары, мәтінді латын әліпбиіне аударудың ІТ қосымшалары әзірленбек. Ал екінші кезең 2021-2023 жылдары қолға алынбақ.

«2021-2023 жылдары латын графикасы негізінде мемлекеттік тілде Қазақстан Республикасының төлқұжатын, жеке куәлігін және басқа да құжаттарды беруді қамтамасыз ету көзделген. Филологтар мен ғалым-лингвистерді тарта отырып, орталықтардың оқытушылары мен ересек халықты үйрету үшін семинарлар мен лекциялар, курстар ұйымдастырылатын болады», - деді ҚР Мәдениет және спорт вице-министрі Ерлан ҚОЖАҒАПАНОВ.

Қожағапанов 2024-2025 жылдары аралығында мемлекеттік органдардың, білім беру ұйымдарының, мемлекеттік бұқаралық ақпарат құралдарының және баспалардың құжат айналымдарын кезеңменен көшіру жоспарланғанын айтты.