Президент Алматыны қалпына келтіру жұмыстарын жіті назарға алып отыр – Станислав Канкуров

«Президент мемлекет пен қоғамның дамуына және заман талап ететін өзгерістерді енгізу жайлы нақты және терең пікірлер айтты». Қасым-Жомарт Тоқаевтың «Qazaqstan» телеарнасына берген сұхбатына орай Алматы қаласы мәслихатының хатшысы Станислав Канкуров осылай деп пікір білдірді, деп хабарлайды Almaty.tv тілшісі.  

«Қайғылы қаңтар оқиғасының себептері мен салдарлары жан-жақты және терең зерттеледі. Бұл оқиғаның мемлекет пен қоғам үшін үлкен сабақ болғаны тілге тиек етілді. Қазір тергеу барысында әрбір іс бойынша әділ шешім шығару керек екенін атап өтті. Бұл Президент үшін басты принцип болып қалады.

Сондай-ақ ОДКБ әскерінің уақытылы енгізілгендігі және бұл шешім ешбір қарыздарлық емес, керісінше ОДКБ келісім-шарты аясындағы өзара көмек екендігі мәлімделді. Одақтас елдер әскері Қазақстан ішіндегі тұрақтылықты сақтауға атсалысты», - деп атап өтті Станислав Канкуров.

Алматы қаласы мәслихатының хатшысы Президент сұхбаты барысында шекара мен көршілес достық қарым-қатынастың да сарапталғанын, сонымен қатар халықтың әлеуметтік жағдайын көтеру тетіктерінің аталып өткенін еске салды.

«Қазақстан Ресеймен мәңгілік достық пен стратегиялық серіктестік жөніндегі маңызды құжатқа қол қойған. Екі ел шекарасы заңды түрде бекітілген. Бұл ретте Президент ресейлік кейбір азаматтардың Қазақстанның солтүстік облыстары Ресейге тиесілі деген пікірді қате ой деді.

Қоғамда қордаланған проблема – халықтың әлеуметтік жағдайының төмен екендігін білеміз. Осы ретте байлықтың басым бөлігі кішігірім топта шоғырланған. Бұл проблема тыңғылықты шешіледі. Монополия мен олигополияны жою мақсаты қойылған. Осымен бірге заңсыз жолмен қол жеткізілген және шетелеге әкетілген қаражат елімізге қайтарылатын болады. Президент үкіметке екі ай ішінде нақты ұсыныстарды енгізуді тапсырды. Қазақ жерінде табылған қаражат ел игілігі үшін қызмет етуі керек», - деді С. Канкуров.

Ол сондай-ақ Президенттің Алматы қаласы туралы пікірін келтіре отырып, осы орайда шаһар келбетін қалпына келтіруде қала әкімімен қатар, қалалық мәслихат депутаттарының да белсенді жұмыс істеп отырғанын атап өтті.

«Қасым-Жомарт Кемелұлы Алматы қаласына ерекше тоқталып өтті. Сүйікті қаламыздың шабуылдан кейін қалпына келуі Президенттің жіті назарында. Қала басшысы ретінде еңбекқор және тәжірибесі мол Ерболат Досаевты осы мақсатта тағайындады. Әкім алдында қаланы қалпына келтіру, зардап шеккен кәсіпкерлер мен азаматтарға жәрдемдесу міндеті аса маңызды болады. Алматы Мәслихатының депутаттары бұл арнадағы жұмысқа белсенді араласып келеді. Және алдағы уақытта да бар күшін салады.

Халқымыздың берекесін ұлғайту, Тәуелсіз Қазақстанды нығайтып, нақты іспен дәріптеу маңызды. Біз Президентіміздің ой-тұжырымдарын қолдаймыз және Жаңа Қазақстанды құруға ортақ шоғырлануымыз қажет деп есептеймін», - деді қалалық мәслихат хатшысы.