Бостандық ауданында №113 мемлекеттік балабақша күрделі жөндеуден кейін өз есігін ашты, деп хабарлайды Almaty.tv.
Жөндеу жұмыстары 2021 жылдың қыркүйегінде басталды, оларды «SKS Инжиниринг» ЖШС мердігерлік ұйымы жүргізді. Айта кетерлігі, жөндеу мерзімі мердігердің міндеттемелерді уақтылы орындамауына байланысты ұзарды, нәтижесінде сот тәртібімен оған айыппұл салынды.
Бүгінде балабақша ғимаратының шатыры мен қасбеті толығымен жөнделді, ішкі бөлмелерде де жөндеу жұмыстары жүргізілді. Ғимаратта терезе және есік блоктары, электрмен жабдықтау, жылыту, сумен жабдықтау және су бұру жүйесі ауыстырылды, үй-жайларды әрлеу жүргізілді, қасбеті оқшауланған және қапталған. Бейнебақылау, бақша аумағын жарықтандыру орнатылды. Ғимарат тек сыртынан ғана емес, ішінен де толық өзгерді.
Бүгінде нысан балаларды сапалы мектепке дейінгі білім берумен қамтамасыз ету үшін барлық қажетті жабдықтармен жабдықталған. 2023 жылдың 25 желтоқсанынан бастап балаларды қабылдау басталды.
Балабақшада барлығы 12 топ жұмыс істейді. Орындар саны 280 тәрбиеленушіге арналған және қазіргі уақытта балабақша жартысына толды. Балаларды балабақшаға қабылдау балабақша толық толтырылғанға дейін Вalabagsha bilimalmaty сайты арқылы жүзеге асырылады.
Айта кетерлігі, 2023 жылы Алматыда тағы 3 мемлекеттік балабақшада күрделі жөндеу жұмыстары басталды – №70, №163, №168. Бұл ретте Түрксіб ауданында орналасқан №70 мемлекеттік арнайы бөбекжай-бақшасын жөндеу аяқталды және жақын арада ол пайдалануға беріледі. №163 және №168 балабақшаларды 2024 жылдың соңына дейін жөндеу жоспарлануда.
Сондай-ақ 2024 жылы тағы 6 балабақша ғимараттарына күрделі жөндеу жүргізу жоспарлануда: №37, №153, №20, №10, №137 және №158.
Сонымен қатар қалада «Ақжар», «Алтын Бесік» және «Жас Қанат» шағынаудандарында 700 орындық үш жаңа балабақша салынуда. Оларды биылғы 2-тоқсанда аяқтау жоспарлануда. Бұл бүгінде Бостандық ауданында 2300 орынды құрайтын мектепке дейінгі білім беру ұйымдарында орын тапшылығын азайтуға көмектеседі.
Еске салсақ, 2023 жылы мектепке дейінгі білім беру саласында 5905 орындық 85 жаңа мектепке дейінгі ұйым ашылды. Олардың ішінде 290 орындық бір мемлекеттік балабақша және 5615 орындық 84 жеке балабақша бар.
