Әуезов ауданын сумен жабдықтау жұмыстары қалай жүріп жатыр

Алматы қаласы әкімі Ерболат Досаев Әуезов ауданы халқымен кездесуінде ауданды сумен жабдықтау және канализация жұмыстары қалай жүріп жатқанын айтып берді, деп хабарлайды Almaty.tv.

Қала әкімінің айтуынша, жыл басынан бері 4 жерде 185-тен астам авария болған. Сондықтан әкімдік осы учаскелердегі инженерлік желілерді жаңғырту мәселесін ерекше бақылауға алды. Бұл – Достық, Мамыр-4 шағынаудандары және «Саин Шаляпин-Жандосов-Қарғалы өзені» көшелері, сондай-ақ Арычная, Ықылас, Западная көшелерінің учаскесі. 

"Менің тапсырмам бойынша биыл сәуір айынан бастап осы шағынаудандар мен учаскелерде жалпы ұзындығы 75,8 км сумен қамту және су бұру желілерін (сумен қамту – 29 км, су бұру – 46,8 км) салу және жаңарту жобасы әзірленіп жатыр.  2023 жылдың қаңтар айында жобалау-сметалық құжаттаманы әзірлеуді аяқтап, мемлекеттік сараптамаға жіберу жоспарланған", - деп мәлімдеді Досаев.

Оның айтуынша, сараптамадан шыққаннан кейін және жаңа құрылыс маусымы басталған кезде 2023 жылдың II-ші тоқсанында құрылыс-монтаждау жұмыстары басталады. 

Осы жобаларды іске асыру 2024 жылдың IV-тоқсанына қарай барлық 4 учаске бойынша 11 мыңнан астам абонентті сапалы сумен және канализациямен қамтамасыз етуге мүмкіндік береді.