Алматының Алатау ауданында жол инфрақұрылымын дамыту жұмыстары қалай жүріп жатыр

Алматы қаласының әкімі Ерболат Досаев Алатау ауданы тұрғындарымен кездесуінде аудандағы жол инфрақұрылымын дамыту жұмыстары қалай жүріп жатқанын айтып берді, деп хабарлайды Almaty.tv.

Қала әкімінің айтуынша, осы жылдың басынан бастап ауданындағы 53 көшеде ұзындығы 42 км жолды орташа жөндеу жүріп жатыр. 

"Бүгінде Рысқұлов (1,7 км), Райымбек (4,6 км) даңғылдары, Жаңа Саин (4,5), Өтемісұлы (3,9 км) көшелерінде, сондай-ақ Дархан (5,4 км), Саялы (1,7 км), Ұлжан (2,3 км), Өжет (1,1 км), Көк-Қайнар (1,9 км) шағынаудандарында жұмыстар аяқталды. Осы жылдың 15 қарашасына дейін Алғабас (2,2 км) және Ақбұлақ (14,7 км) шағынаудандары бойынша жолды орташа жөндеу жұмыстары аяқталады", - деп мәлімдеді Досаев.

Сондай-ақ әкім индустриялық аймақтағы және Көк Қайнар, Әйгерім-1, 2, Саялы, Самғау, Зерделі шағынаудандарында 35 көшені ағымдағы жөндеу аяқталғанын айтып өтті.

"Сонымен бірге, Алғабас шағынауданында өткен жылдан бері 32 км жаңа жол салынып жатыр. Жұмыстарды 2023 жылдың желтоқсан айында аяқтау жоспарланған. Келесі жылдың III-тоқсанында Шаңырақ-1 (8,5 км) және Шапағат (4,8 км) шағынаудандарында сумен жабдықтау және канализация желісін төсеу аяқталғаннан кейін 13 км жаңа жол салу басталады. Жаңа тұрғын үй кешендерін салуға және тұрғындар санының артуына байланысты, сіздердің өтініштер бойынша Момышұлы көшесіне жаяу жүргіншілер өткелімен бірге 3 жаңа бағдаршам орнатылды. Бүгінгі таңда құрылыс-монтаждау жұмыстары аяқталды, бағдаршамдар қосылды", - деп толықтырды мегаполис басшысы.