Алматыда жылыту маусымына қалай дайындалып жатыр

Алматы қаласының әкімі Ерболат Досаев алдағы жылыту маусымына дайындық бойынша штабтың кезекті кеңесін өткізді, деп хабарлайды Almaty.tv.

Жөндеу және дайындық жұмыстарының аралық қорытындылары туралы Энергетика және сумен жабдықтау басқармасының, сондай-ақ «Алматы жылу желілері» ЖШС, «Алматытеплокоммунэнерго» ЖШС, «Алматы Су» МКК, «Алматы электр станциялары» АҚ, «Алатау Жарық компаниясы» АҚ, «Қазтрансгаззаймақ» АҚ және т. б. басшылары  баяндады.

Қала басшысы Алматының жылыту маусымына дайындығы ерекше бақылауда екенін, коммуналдық кәсіпорындар бекітілген кестеге сәйкес барлық дайындық шараларын аяқтауы қажет екенін атап өтті.

Энергетиктердің ақпараты бойынша, қалалық жылу энергетикалық кешеннің жылу беру кезеңіне дайындығы жоспар бойынша жүруде және ол 75,6% -ды құрайды. Бұл ретте газ желілерінің дайындығы 76,7%, сумен жабдықтау – 80%, электр желілері – 72%.

Қаланың қысқы маусымға 100% дайындығы 2023 жылдың 1 қазанына дейін қамтамасыз етіледі.

Осы жылдың жылуаралық кезеңінде Алматыда 17,7 км жылумен жабдықтау, 120 км электрмен жабдықтау, 43 км сумен жабдықтау, 29 км газбен жабдықтау желілері қайта жаңартылып, жөнделуде.

Қазіргі уақытта Алматы қаласының тұтынушыларына үздіксіз жылу беруді қамтамасыз ету үшін «Алматыжылукоммунэнерго» ЖШС 84 қазандығын жөндеу жұмыстары жүргізілуде.

Дайындық жұмыстары «Алматы электр станциялары» АҚ нысандарында да жүргізілуде: жылыту маусымының ойдағыдай өтуі үшін энергетикалық генерациялайтын жабдыққа жөндеу жұмыстары жүргізілуде. ЖЭО-2-нің 5 қазандығын жөндеу аяқталды, бұл мегаполис тұрғындарын жылыту маусымында жылумен қамтамасыз етуге мүмкіндік береді. Сонымен қатар, бекітілген кестеге сәйкес биылғы жылдың қараша айына жоспарланған қосымша 3 қазандықты жөндеу жұмыстары қазан айының соңына дейін аяқталатын болады.Бұл шаралар жылыту маусымын уақтылы бастауға және қыркүйек айының соңында айналымды бұруға мүмкіндік береді.

Кеңес барысында Ерболат Досаев әлеуметтік нысандар мен тұрғын үйлерді күзгі-қысқы кезеңге дайындау мәселесіне ерекше назар аударды. Энергетиктердің деректері бойынша тұрғын үй қорының дайындығы бекітілген кестеге сәйкес – 59,5%, білім беру объектілері – 76,2%, денсаулық сақтау – 66,4%.

Кеңес қорытындысы бойынша қала әкімі энергетика басқармасына бірқатар тапсырмалар берді: жылумен жабдықтау объектілеріндегі дайындық жұмыстарының барысын бақылауға, сонымен қатар реконструкциялау аяқталған соң Бостандық ауданының бұрыннан бар 200 мыңнан астам тұтынушысын, сондай-ақ перспективадағы тұтынушылардын (салынып жатқан тұрғын үй кешендерін) жылумен қамтамасыз ететін Южный аудандық қазандығына ерекше назар аударды. Сондай-ақ, қала басшысы ағымдағы жылдың 1 қыркүйегіне дейін жол жабындысын және басқа да орындарды қалпына келтіру бойынша барлық жұмыстарды аяқтау туралы тапсырма берді.

Айта кетерлігі, қалалық нысандарды алдағы жылыту маусымына дайындау мәселелері бойынша кеңестер ай сайын өткізілетін болады.