Jasyl Almaty: Алматыда келер жылы 380 мың ағаш отырғызылады

Қала әкімі Бақытжан Сағынтаев өзінің Instagram-дағы аккаунтында үш жыл ішінде Jasyl Almaty абаттандыру бағдарламасы бойынша 1 млн ағаш отырғызылатынын еске салды, деп хабарлайды Almaty.tv.

«Өткен жылы 135 мың ағаш егілсе, биыл 282 мың. Бұл бес жылдық норма. Көгалдандыру алаңы өткен жылғы 7,7 шаршы метрден бір адамға 8,5 шаршы метрге жетті. Келесі жылы тағы 380 мың ағаш отырғызамыз. Бес жаңа саябақ аймағы құрылады. 2022 жылы бір адамға жасыл желектердің ауданы 11 шаршы метрді құрайды. Норма бойынша 10 шаршы метр болуы керек»,– деп жазды Б. Сағынтаев.

Көгалдандыру жұмыстарына қарапайым қала тұрғындары, экобелсенділер, бизнес, құрылыс пен сауда компанияларының өкілдері қатысты. Олар көшеттер алып, команда болып жасыл белдеу құруға атсалысуда. Соның бірі Алатау ауданындағы - «Сосновый бор».

«Жақында 65 га аумаққа 480 қылқан жапырақты ағаш отырғыздық. Бүгінде мұнда үш мыңға жуық ағаш бар. Бұл жер қаланың тартымды аймағына әрі оттегі фабрикасына айналады»,– деді мегаполис әкімі.