Дезинфекция коронавирустың таралуын және пневмония түріндегі аурудың асқынуын азайтады – Алматы ҚБКА эпидемиологы

Алматы қалалық балалар жұқпалы аурулар клиникалық ауруханасының эпидемиологы Баянсұлу Табинова мегаполис аумағында жүргізілетін дезинфекциялық жұмыстардың қажеттілігі туралы айтып берді, деп хабарлайды Almaty.tv тілшісі қала әкімдігінің баспасөз қызметіне сілтеме жасап. 

Оның пікірінше, жүргізілген дезинфекция коронавирус инфекциясының таралуын және пневмония түріндегі аурудың асқынуын азайтады.

«Еліміздегі қауіпті эпидемияға байланысты дезинфекция белсенді түрде жүргізілуде. Тазалық жұмыстары көбіне қоғамдық көліктерде, саябақтарда, ойын алаңдарында, яғни, қоғамдық орындарда жасалып жатыр. Дезинфекцияның ең басты маңызы – вирустың адамдар арасында таралуын болдырмау және патогендік микроорганизмдерді жою болып табылады»,  – деп толықтырды Баянсулу Табинова.

Дезинфекция жасау үшін тек Қазақстан Республикасы және Кеден одағы елдері аумағында қолдануға рұқсат етілген препарттар ғана пайдаланылатынын маман айтып өтті. Дезинфекциялық ерітінді қатаң нұсқауларға сәйкес дайындалады.

Сондай-ақ, қоғамдық орындарда жүргізіліп жатқан тазалық жұмыстары вирустың таралмауына тікелей әсер ететінін айтты.

«Дезинфекция – вирусты пневмонияны тудырмайды, өйткені ол вирусты пневмонияны тудыратын вирус қоздырғыштарын жояды. Қазіргі заманауи дезинфекция жасайтын құралдар қауіптілігі жағынан 4-ші топқа жатады. Бұл- ең төмен қауіпті білдіреді. Сондықтан бұл адам және жануарлар өміріне қауіпсіз екендігін айтқым келеді»,  – деді Баянсұлу Табинова.

Коронавирус инфекциясының таралуын алдын алу мақсатында, Алматы қаласының қоғамдық орындарында кең көлемді дезинфекция жүргізіліп жатқандығын естеріңізге сала кеткеміз келеді.