Алматы қаласы мәслихатының кезекті XXII сессиясы өтті

Алматы әкімінің орынбасары Асқар Әмрин өз сөзінде атап өткендей, мегаполис бюджетіне жоспарланған өзгерістер сомасы 83 млрд теңгені құрайды, деп хабарлайды Almaty.tv тілшісі Алматы қаласының Мәслихатына сілтеме жасап.

«Аталған бюджетті нақтылауда бюджеттік бағдарламалар әкімшілері арасында ішкі қайта бөлу және өткен жылдан бастап 28,1 млрд теңге сомасында бос қалдықтарды пайдалану есебінен пайда болған 54,9 млрд теңге сомасындағы қаражат пайдаланылатын болады», - деп түсіндірді А. Әмрин.

Алматы қаржы басқармасының басшысы Қанат Сухамбековтың айтуынша, аталған қаражат қала тұрғындары үшін басым және әлеуметтік маңызды жобаларды іске асыруға бағытталатын болады. Олардың бірі – білім беру саласына. Бюджетті нақтылау шеңберінде білім беру саласындағы қаржыландыру 482,3 млрд теңгеге немесе қала бюджетінің 26%-на дейін ұлғайтылды.

Мемлекет басшысының «Жайлы мектеп» жобасын іске асыру жөніндегі тапсырмасын орындау мақсатында «Ақбұлақ» ш/а («Нұрлы Дала» ТК ауданында), «Теректі» ш/а, Розыбакиев – Левитан көшесінде, «Саялы» ш/а 5 600 орындық 4 мектептің құрылысы аяқталуда.

Сондай-ақ мектепке дейінгі білім беру ұйымдарында орын тапшылығын төмендету мақсатында Орбита-3 ш/а балабақшаны қайта жаңартуды жалғастыруға 1,6 млрд теңге бөлінеді және №10 шағынауданда балабақша құрылысының басталды. Бұл 600-ден астам баланы мектепке дейінгі біліммен қамтуға мүмкіндік береді. Бұдан басқа, ағымдағы жылы Түрксіб және Әуезов аудандарындағы №83 және №155 мектептерді қайта жаңарту, сондай-ақ қаланың Бостандық ауданындағы №138 мектепті сейсмикалық күшейту аяқталады.

Шахматты дамытудың 2023-2027 жылдарға арналған Кешенді жоспарын іске асыру мақсатында жаңа оқу жылынан бастап қаланың 41 мектебін бастауыш сыныптарда шахматтан жаңа оқу пәнін енгізу жоспарлануда.

Сонымен қатар, қаржы басқармасының басшысы қосымша қаржыландырудың арқасында 2,3 млрд теңге көлемінде «Шапағат» және «Алғабас» ш/а сумен жабдықтау және су бұру желілерінің, сондай-ақ Медеу ауданындағы кәріз желілерінің құрылысы аяқталатынын хабарлады. Бұл санитарлық стандарттарға сәйкес аталған аудандардың 20 мыңнан астам тұрғыны үшін сапалы су мен кәрізге қолжетімділікті қамтамасыз етуге мүмкіндік береді.

Мегаполистің көлік қатынасын жақсарту мақсатында Сейфуллин – Жансүгіров даңғылындағы көлік айрығының құрылысы жалғасады.

Отырыс барысында депутаттар қалада бейбіт жиналыстар өткізетін мамандандырылған орындарды өзгерту, ведомстволық бағынысты ұйымдардың қызметкерлеріне еңбекақы төлеуді арттыру мәселелерін талқылады. Сондай-ақ депутаттар жергілікті бюджетке жағымды әсер ететін LED-экрандар түріндегі объектілерге Жарнама орналастыру үшін ай сайынғы төлемақы мөлшерлемелерін ұлғайту ұсынысын қолдады. Осылайша, күн тәртібінде қаралған міндеттер қаланы одан әрі сапалы дамытуға және алматылықтардың өмір сүру деңгейін арттыруға бағытталды.

Оқи отырыңыз: Жазғы мектеп: Алматыдағы медиаторлар ҚХА өкілдерімен кездесті