Алматыда 7 500 орындық 5 мектептің құрылысы жыл соңына дейін аяқталады. Бұл туралы құрылыс басқармасының мамандары мәлімдеді, деп хабарлайды Almaty.tv.
Қазірдің өзі шаһарда әлеуметтік нысандардың құрылысы қарқынды жүріп жатыр. Мәселен, келесі жылға дейін 920 орындық 4 балабақша салу да жоспарда бар. Одан бөлек, мектеп пен мектепке дейінгі оқу нысандарында сейсмикалық күшейту жұмыстары жүргізіліп жатыр.
«Оқу орындарының тапшылығы бар болғандықтан 8 мектеп құрылысын бастағанбыз. Соның үшеуі 5100 орындық мектеп оқу жылының басында қолданысқа беріледі. Жылдың аяғына дейін 7500 орындық 5 мектептің құрылысы жүргізіліп жатыр», – деді Құрылыс басқармасы басшысының орынбасары Олжас Тәжібаев.
