Жол, су және жарықтандыру: тұрғындардың кездесуде айтылған мәселесі қалай шешіледі

Алматы әкімі Ерболат Досаев Наурызбай ауданының тұрғындарымен кезекті кездесу өткізді, деп хабарлайды Аlmaty.tv.

Қала әкімдігінің баспасөз қызметі 2023 жылдың тамыз айында аудан тұрғындарымен кездесуде мегаполис басшысының берген тапсырмаларының орындалғаны туралы айтып берді.

Содан кейін тұрғындар коммуналдық инфрақұрылыммен қамтамасыз ету, жолдарды жөндеу, көшелерді жарықтандыру, мектепке дейінгі ұйымдарда орын тапшылығы және т.б. мәселелерді көтерген болатын.

Нәтижесінде 2023 жылы ауданның 170 көшесіндегі шұңқырлар жойылды, 1000 люк түзелді,100 люк пен жаңбыр қақпақтары ауыстырылды. Сондай-ақ жарамсыз болып қалған арық науаларын ауыстыру жұмыстары жүргізілді. Орташа жөндеу аясында Қалқаман, Шұғыла және Тастыбұлақ шағынаудандарының ұзындығы 13,9 км 18 көшесінде жұмыстар жүргізілді.

Сондай-ақ Шұғыла шағынауданы су құбыры желілерінің тартылып қалуына қатысты шағымдар болды. Өткен жылдың қорытындысы бойынша 28 км су құбыры мен кәріздің құрылысы аяқталды.

Бұдан басқа, "Халық қатысатын бюджет" бағдарламасы аясында жалпы ұзындығы 48 км болатын 57 көше мен тұйық көшелерде сыртқы жарықтандыру желілері салынды, 800 тірек орнатылды.

Кездесуде гүлзарлар мен саябақ аймақтарындағы жасыл желектерге күтім жасау, атап айтқанда уақтылы суару мәселесі көтерілді. Нәтижесінде, Алатау, Нұрмұхамедов көшелерінің учаскелерінде және Ақжар скверінде автоматтандырылған суару жүйесі орнатылды.

Ауданның өзекті мәселелерінің бірі - мектепке дейінгі және мектеп мекемелерінде орын тапшылығы. Қала әкімінің тапсырмасы бойынша қазан айында Шұғыла шағынауданда №174 мектепке 375 оқушыға арналған қосымша құрылыс жұмыстары басталды. "Мектеп автобусы" жобасы аясында жеті мектепке 2939 оқушыны қамтитын 32 автобус бөлінді. Сондай-ақ желтоқсан айында Құрамыс және Шұғыла шағынаудандарында 640 орындық екі балабақшаның құрылысы басталды. Сонымен қатар 2023 жылы ауданда 806 орындық 16 жеке балабақша ашылды.

Оқи отырыңыз: Наурызбай ауданының барлық көшелері 2024 жылдың соңына дейін жарықтандырылады