Қала күніне орай Алматыда бизнес туралы ең үздік бейнеролик байқауы өтті

Қала күніне орай Алматы қаласы Кәсіпкерлік және инвестициялар басқармасы бизнес туралы ең үздік бейнероликті анықтау үшін «Voice of business Almaty» байқауын өткізді, деп хабарлайды Аlmaty.tv.

Байқау шарттарына сәйкес, қатысушылар аты -жөнін, орналасқан жерін, кәсібін және отандық бизнесті дамытуға қосқан үлесін көрсете отырып, өз бизнесі туралы қысқаша бейнеролик түсіріп, оны #voiceofbusinesalmaty #almatyday #30летнезависимостирк хэштегтерімен жеке немесе бизнес-аккаунттарына орналастыруы тиіс.

Байқау жарияланған 3 апта ішінде 20-дан астам жұмыс келіп түсті. Байқау комиссиясының құрамына Алматы қаласының Кәсіпкерлік және инвестициялар басқармасының, Кәсіпкерлер форумының, Алматы қаласы Кәсіпкерлер палатасының, сондай-ақ, БАҚ өкілдері мен бизнес-тренерлер кірді. Қазылар алқасы жұмыстарды жобаның бірегейлігі, әлеуметтік маңызы, қаралу саны, ұнатулар мен пікірлер бойынша бағалады.

Комиссия шешімімен 3 жеңімпаз анықталды:

1 орын – Гүлзира Каримбаева, «Шарын сыйлары» табиғи шырынын өндіруші.

2 орын – Александр Легенчук, Қазақстанда мүмкіндігі шектеулі жандар ақысыз жаттығу жасай алатын жалғыз фитнес-клуб – «LegenDA» негізін қалаушы.

3 орын – Дина Сармантаева, Astau Mall брендінің негізін қалаушы, ұлттық үлгідегі ағаштан жасалған ыдыс-аяқ өндіруші.

«Сіздерді құттықтауға рұқсат етіңіздер, біз сіздердің бизнестеріңізге сәттілік пен өркендеу тілейміз! Осы байқау арқылы біз қаламыздың ең креативті кәсіпкерлерін мойындағымыз келеді. Өтініштер көп болды, ең жақсы бейнені таңдау оңай болған жоқ. Алайда, әлеуметтік маңызы, жобалардың бірегейлігі, Алматы қаласының экономикасына қосқан үлесі Комиссия мүшелерінің ғана емес, қала тұрғындарының да назарынан тыс қалмады, ол әлеуметтік желідегі пікірлер мен пікірлердің санынан байқалады», - деп атап өтті Алматы қаласының Кәсіпкерлік және инвестициялар басқармасының сауда бөлімінің басшысы Бекжан Қуанышев құттықтау сөзінде.

Жеңімпаздарға алғыс хаттардан өзге, демеушілерден бағалы сыйлықтар – Royal Club Fitness & Spa фитнес залына 500 000 теңге көлеміндегі жылдық жазылым, Sulpak сауда үйінен 150 000 және 100 000 теңге көлемінде ақшалай сертификаттар берілді.

«Алған әсерім керемет! Мұндай сезімді соңғы рет қашан басымнан өткергенім есімде жоқ! Қала әкімшілігінің бізді, жас кәсіпкерлерді байқағанына қуанып тұрмын. Мен жеңімпаз боламын деп мүлдем күтпеген едім. Сондықтан армандаңыз және арманыңызды жүзеге асырыңыз!» - дейді 1 -орын иегері, көпбалалы ана,«ҚДБ-2025» бағдарламасы бойынша жеке кәсіп ашуға грант алған Гүлзира Кәрімбаева.