Қаладағы әрбір дене шынықтыру-сауықтыру кешенінде бассейн болуы керек

Ерболат Досаев дене шынықтыру-сауықтыру кешендерін жобалау нормативтерін қайта қарауды тапсырды, деп хабарлайды Аlmaty.tv.

Алматы әкімі Ерболат Досаев жұмыс сапары барысында Алатау ауданының Зерделі шағынауданына барды. Аумағы 3 мың шаршы метрден асатын жаңа дене шынықтыру-сауықтыру кешенінің құрылысын тексерді. Қала басшысына спорт зал, секциялық сабақтарға арналған нысандар көрсетілді.

Ерболат Досаев спорт басқармасының басшысына жобада бассейннің жоқтығын көрсетіп, құрылысы жоспарланған барлық дене шынықтыру-сауықтыру кешенінде бассейнге орын қарастыруды тапсырды.

Жаңа дене шынықтыру-сауықтыру кешенін көрген Алматы әкімі нысанды мұндай жағдайда қабылдауға тыйым салды. Қала әкімі құрылыс басқармасы басшысына нысанды тиімсіз пайдаланбауға, ғимараттың орталықта болуына және келушілердің сабаққа қатысуына ыңғайлы етіп қайта қарау керектігін айтты. 

Сонымен қатар Ерболат Досаев мүмкіндігі шектеулі жандар үшін қолайлы жағдай жасауды жүктеді.

Дене шынықтыру-сауықтыру кешені құрылысын «КАПСТРОЙГРУПП-Т» ЖШС мердігерлік ұйымы 2021 жылдың тамызында бастаған. Алайда құрылыс материалдарының қымбаттауына байланысты жұмыс 2021 жылдың соңында тоқтатылып, 2022 жылдың жазында жобаға түзету енгізілген соң қайта жанданды. Бүгінде кешенді салу бойынша құрылыс-монтаж жұмыстары аяқталды. Қазір ғимарат инженерлік желілерге қосылған, аумақты абаттандыру жұмыстары жалғасып жатыр.

Зерделі шағынауданында жаңа дене шынықтыру-сауықтыру кешені Алатау ауданында алғаш рет салынып отыр. Оған күніне 400-ге дейін бала бара алады. Дене шынықтыру-сауықтыру кешені ауданның спорт секциясына деген қажеттіліктерін ескере отырып жобаланған: Зерделіде балалар баскетбол, волейбол, дзюдо, таэквондо, бокс және пауэрлифтингке қатыса алады.

Алатау ауданының әкімі Азамат Қалдыбеков қала басшысына тұрғындардың өмір сүру сапасын жақсарту бойынша қабылданып жатқан шаралар туралы баяндап, денсаулық сақтау және білім беру нысандарын салу жобасын ұсынды. Ерболат Досаев Зерделі шағынауданда саябақ құрылысы аясында көгалдандыру мәселесіне ерекше назар аударуды және жасыл желектердің санын көбейтуді тапсырды.

Анықтама: Алматыда балалар мен жастарды қолжетімді спорт секцияларымен қамтамасыз ету, халықты салауатты өмір салтына тарту үшін Медеу ауданының Алатау шағын ауданында және Түрксіб ауданының Жас Қанат шағын ауданында дене шынықтыру-сауықтыру кешені пайда болады. Олардың құрылысы кестеге сәйкес, 2023 жылдың соңына дейін аяқталады.

Оқи отырыңыз: Алматы әкімдігі Айнабұлақ - 4 шағынауданындағы балабақша құрылысын сапасыз жүргізген компанияны сотқа береді