Алматыда алғаш рет кардиовертер-дефибрилляторды имплантациялау отасы жасалды

Алматы қаласының Орталық қалалық клиникалық ауруханасында (ОҚКА) алғаш рет имплантацияланатын кардиовертер-дефибрилляторды (ИКД) орнату операциясы сәтті жүргізілді. Бұл заманауи құрылғы жүректің кенеттен тоқтап қалуының алдын алуға арналған, деп хабарлайды Almaty.tv.

Ауруханаға жүректің ауыр ауруымен және айқын жүрек жеткіліксіздігімен 58 жастағы науқас түсті. Жүректің жиырылу функциясы айтарлықтай төмендеген — лақтыру фракциясы 27–28% құрады, ал қалыпты жағдайда бұл көрсеткіш 55–70% аралығында болады. Мұндай жағдай науқастың өміріне қауіп төндіретін жүрек ырғағының бұзылыстары, соның ішінде жүректің кенеттен тоқтап қалуы қаупі жоғары топқа жатқызады.

Науқасқа шұғыл медициналық көмек қажет болды. Өлімге әкелуі мүмкін асқынулардың алдын алу мақсатында жоғары технологиялық операция жасау туралы шешім қабылданды.

«ИКД имплантациясы жергілікті анестезиямен жүргізілді. Құрылғы бұғана асты аймағына орнатылып, электродтар қан тамырлары арқылы жүрек қуыстарына жеткізілді. Қауіпті ырғақ бұзылысы туындаған жағдайда құрылғы оны автоматты түрде анықтап, дереу әсер етеді және жүректің қалыпты жұмысын қалпына келтіреді. Бұл — жүрек ырғағын сәтті қалпына келтіру ықтималдығы ең жоғары болатын аса маңызды сәт», — деп түсіндірді ОҚКА аритмологы Ғани Төлепбергенов.

Имплантацияланатын кардиовертер-дефибриллятор науқасты өмірге қауіп төндіретін аритмиялардан стационарда да, ауруханадан шыққаннан кейін де тұрақты түрде қорғауды қамтамасыз етеді.

Науқасқа МӘМС аясында екі камералы имплантацияланатын кардиовертер-дефибриллятор орнатылды. Қазіргі таңда науқастың жағдайы тұрақты, ол әрі қарай амбулаториялық бақылауға шығарылды. Аталған операцияның орындалуы ОҚКА-да жоғары технологиялық медициналық көмекті дамытудың маңызды кезеңі болып, жүрек ырғағының ауыр бұзылыстары бар науқастарды емдеу мүмкіндіктерін кеңейтті.

Оқи отырыңыз: Конституциялық сот сайлауды реттейтін нормаларды қараудан бас тартты