Алматыда Қала күніне орай 3,5 метрлік ағаштар мен ерекше өсімдіктер егіледі

Алматыда Қала күніне орай 32 түрге жататын 1,5 мыңға жуық жаңа өсімдік егіледі. Қалаға биіктігі 3,5 метрге дейін жететін ірі ағаштар, сәндік пішін берілген қылқанжапырақты ағаштар, діңі қалыптастырылған өсімдіктер, бұталар мен гүлдейтін көпжылдық өсімдіктер жеткізілді. Бұл жөнінде Алматы қаласы Экология және қоршаған орта басқармасының өкілдері хабарлады, деп хабарлайды Almaty.tv. 

Олардың арасында бұтақтары бірнеше деңгейлі етіп қалыптастырылған ересек ағаштар ерекше көзге түседі. Кейбіріне бақ бонсайы стилінде сәндік пішін берілген. Ағаштардың айрықша пішіні алдын ала қалыптастырылып, кейін өскен сайын сақталып отырады.

Өсімдіктердің қатарында үнді лагерстремиясы, қара қарағай, шашақты гортензия, раушан, бөріқарақат, күңгірт қызылкүрең, сәлбен, нарқайсар және басқа да сәндік өсімдіктер бар.

Алматыға арналған өсімдіктердің түрлері қытайлық мамандармен бірлесіп іріктелді.

Өсімдіктерді таңдаудан бұрын қаланың климаттық ерекшеліктері, температураның ауытқуы және қыстап шығу жағдайлары зерттелді. Соның нәтижесінде жергілікті климатқа бейімделу мүмкіндігі ескеріліп, қолайлы өсімдік түрлері мен сұрыптары таңдалды.

Жақында жаңа өсімдіктерді қала аумағына отырғызу жұмыстары басталады.

Оқи отырыңыз: Қазақстан мен Корея стратегиялық серіктестікті жаңа деңгейге көтеруге уағдаласты