Дархан Сатыбалды Мәслихат сессиясында Алматының дамуы жайлы баяндады

Қала әкімі Дархан Сатыбалды Мәслихат отырысында 2026–2030 жылдарға арналған даму жоспарын ұсынып, қаланың жалпы өңірлік өнімін 70 трлн теңгеге дейін жеткізу, көлік жүйесін жаңғырту және экологиялық жағдайды айтарлықтай жақсарту мақсатын жариялады, деп хабарлайды Almaty.tv.

Алматы қаласының әкімі Дархан Сатыбалды 10 желтоқсанда өткен Мәслихат отырысында 2026–2030 жылдарға арналған даму жоспары мен 2026–2028 жылдарға арналған бюджетті таныстырды. Соңғы бес жылда қала халқы 2,3 миллион адамға дейін өсіп, экономиканың орташа жылдық өсімі 6,8 пайызды құрады, ал жұмыссыздық 5,2 пайыздан 4,4 пайызға дейін төмендеді.

Әкім алдағы бес жылда Алматының жалпы өңірлік өнімін екі есе көбейтіп, 70 триллион теңгеге жеткізу міндеті қойылғанын айтты. Бұл үшін экономиканың нақты өсімі жыл сайын кемінде 6 пайыз болуға тиіс. Дәстүрлі салалармен қатар туризм, IT-сектор, креативті индустриялар мен өңдеуші өнеркәсіп жаңа өсу драйверлері ретінде белгіленген. Шағын және орта бизнестің ЖӨӨ-дегі үлесін 60 пайыздан 65 пайызға дейін арттыру жоспарланып, жеңілдетілген режимдегі кәсіпкерлер үшін мөлшерлеме 4 пайыздан 3 пайызға дейін төмендетілгені атап өтілді.

Қала дамуының маңызды бағыты – көлік инфрақұрылымын жаңғырту. Жоспарға метроны кеңейту, BRT және LRT желілерін іске қосу, қоғамдық көліктің жаңа түрлерін енгізу кіреді. Бұл 2030 жылға қарай қоғамдық көлікпен жасалатын тәуліктік сапар санын 1,7 миллионнан 3 миллионға дейін ұлғайтуға мүмкіндік береді. Сонымен қатар, бес қалалық полицентр қалыптастыру арқылы тарихи орталыққа түсетін жүктемені азайтып, барлық аудандарда қалалық ортаның сапасын арттыру көзделген.

Экологиялық бағытта №2 жылу электр орталығын 2026 жылдың аяғына дейін газға көшіру, кейін №3 ЖЭО-ны бу-газ технологиясына ауыстыру жоспарланып отыр. Бұл жылу көздерінен шығатын зиянды шығарындыларды 92 пайызға дейін қысқартуға мүмкіндік береді. Жеке секторды газдандыру деңгейі қазір 99,6 пайызды құрап, 2027 жылға қарай 100 пайызға жеткізу жоспарланған. Әкімнің айтуынша, ұсынылған жоспар Мемлекет басшысының тапсырмаларына сай Алматы тұрғындарының өмір сүру сапасын жақсартуға бағытталған.

Оқи отырыңыз: Елордада бастауыш сынып оқушылары қашықтан оқиды