Сәтбаев университеті жаңа студенттік жатақхана құрылысының іргетасын қалады

Сәтбаев университетінде университеттің 90 жылдық мерейтойына орайластырып, жаңа студенттер жатақханасы құрылысының басталуына орай болашақ ұрпаққа жолдау жазылған іргетас капсуласы салтанатты түрде салынды, деп хабарлайды Аlmaty.tv.

– Біз 955 орындық 9 қабатты жаңа жатақхананың құрылысын бастауды жоспарлап отырмыз, алдағы 2026 жылы студенттер бізден кілт алып, қоныстанып, жаңа жерде өз өмірлерін бастай алады», – деді Сәтбаев университеті Құрылыс департаментінің директоры Ришат Тыныбеков.

Жаңа жатақхана «Қаржы орталығы» АҚ және ҚР Ғылым және жоғары білім министрлігінің қолдауымен жүзеге асырылып жатқан «Бес әлеуметтік бастама» атты мемлекеттік бағдарламасы негізінде студенттерді жаңа жатақханалардағы орынмен қамтамасыз ету аясында салынады. Жобаны инвестор Forum Invest және EPC Stroy Group құрылыс компаниясы 100% қаржыландырады, бұл құрылыс қазірдің өзінде Алматы қаласының қала құрылысы кеңесімен мақұлданған.

«EPC Stroy Group» компаниясының басшысы Ерлан Қожықов өз сөзінде компанияның Сәтбаев университетімен жұмыс істеуге қуанышты екенін, өйткені бұл олардың ел болашағына қосқан үлесі екенін баса айтты:

– Біз болашақ инженерлері, еліміздің болашақ элитасы жақсы білім алуға қолайлы жағдай жасау үшін инвестиция салуға дайынбыз», – деді ол. – Біз құрылыста экологиялық таза және энергияны үнемдейтін материалдарды қолданамыз, сейсмикалық төзімділік бойынша барлық заңнамалық нормаларды сақтаймыз және жатақхананы 2026 жылдың ақпан айында пайдалануға беруді жоспарлап отырмыз.

Іс-шараға жобаға қатысушы барлық жеті тараптың өкілдері қатысты: университеттің Қамқоршылық кеңесінің төрағасы, профессор Ұлықпан Сыдықов, университеттің Ақсақалдар кеңесі мен Ректорлар кеңесінен профессор Әбдіғаппар Әшімов, Алматы қаласы әкімдігінің Жастар саясаты бөлімінің меңгерушісі Азиз Қажденбек, «Қаржы орталығы» АҚ Алматы қаласындағы өкілдігінің директоры Ұлан Өтебаев, «EPC Stroy Group» компаниясынан Динара Байымбетова және оқытушылар мен студенттер қатысты.

– Қазақ халқында «жеті» деген қасиетті сан бар. Бұл іргетасты жеті түрлі ұйымның өкілдері салғанына назар аударыңыздар. Олардың әрқайсысы осы студенттік жатақхана өте маңызды екенін түсінеді. Ендеше бүгінгі жұмысымыз жемісін беріп, жаңа жатақхана «Дос-Мұқасан» ізбасарлары өсіп-өркендейтін құтты мекенге айналсын», – деді Ұлықпан Сыдықов өз сөзінде.

Уақыт капсуласын салу Сәтбаев университетінің және оның инфрақұрылымының дамуындағы жаңа кезеңнің басталғанын білдірді. Жаңа жатақхана студенттерге қолайлы жағдай жасайды және Сәтбаев университетінің Қазақстандағы инновациялық және техникалық білім берудің жетекші орталығы ретіндегі мәртебесін нығайтуға көмектеседі.

Оқи отырыңыз: Магистратура грантына құжат қабылдау мерзімі қашан басталады