Алматыда қоқыс шығару жұмыстары нақты уақыт режимінде бақыланады

Алматыда қоқыс шығаратын ұйымдардың жұмысы онлайн режимде бақыланады. «Eco Almaty» ЖШС базасында диспетчерлік орталық жұмыс істейді, деп хабарлайды Almaty.tv.

Ол қатты тұрмыстық қалдықтарды шығарумен айналысатын 20 ұйымның жұмысын қадағалайды.

Диспетчерлер нақты уақыт режимінде қоқыс шығару кестесінің сақталуын, контейнерлік алаңдардың санитарлық жағдайын бақылап, бүлінген контейнерлер мен қоқыс жиналған орындарды тіркейді.

Бақылау GPS деректері арқылы жүргізіледі. Қоқыс шығарылғанға дейін және кейін түсірілген контейнерлік алаңдардың фотосуреттері жағдайды жедел бағалауға және жұмыстың орындалғанын тексеруге мүмкіндік береді.

Егер диспетчер қандай да бір бұзушылықты немесе проблемалық учаскені анықтаса, ақпарат дереу экологқа беріледі. Мамандар оқиға орнына барып, жағдайды тексереді. Мұндай бақылау форматы қоқыс жиналған орындарды жедел анықтап, қоқыстың уақытылы шығарылуын бақылауға көмектеседі.