Медеу ауданында оқушы орындарының тапшылығы кезең-кезеңімен шешілуде

Алматы қаласының Медеу ауданында оқушы орындарының тапшылығын азайту бағытында жұмыстар жүргізілуде. Бұл туралы Өңірлік коммуникациялар қызметінде өткен брифингте аудан әкімі Еркебұлан Оразалин айтты, деп хабарлайды Almaty.tv.

Соңғы жылдары аудан мектептерінде орын тапшылығы байқалған. Осыған байланысты 2023 жылдан бастап жаңа білім беру нысандарын салу және қолданыстағы мектептерді кеңейту жұмыстары қолға алынды.

Жыл басында №35 мектеп жанынан 300 орындық қосымша ғимараттың құрылысы аяқталды. Қазіргі уақытта №56 мектепте және №17 мектеп-интернатында күрделі жөндеу жұмыстары жүргізілуде. 

Самал-2 ықшамауданында 300 орындық және №30 мектепте 180 орындық қосымша ғимараттардың құрылысы жалғасуда. Аталған жобалардың нәтижесінде 2026 жылдың соңына дейін 780 жаңа оқушы орны ашылады.

Сонымен қатар, мектепке дейінгі білім беру ұйымдарында да орын санын арттыру жұмыстары жүргізілуде. №112 балабақшада 290 орынға арналған күрделі жөндеу жұмыстары жүргізілуде, ал «Думан» ықшамауданында 320 орындық жекеменшік балабақшаның құрылысы жалғасуда. Бұдан бөлек, биыл жалпы сыйымдылығы 500 орын болатын 10 жекеменшік балабақша ашу жоспарланған.

Жүргізіліп жатқан жұмыстар білімге қолжетімділікті арттырып, аудан бойынша орын тапшылығын азайтуға мүмкіндік береді.

Оқи отырыңыз: Алматыда «Медеу» паркінде жаңа маршрут салынады