Қазақстанның экологиясы нашар өңірлері белгілі болды

Атмосфераға зиян заттардың жартысынан астамы еліміздің екі өңірі - Павлодар және Қарағанды облыстарындағы кәсіпорындардан шығады, деп хабарлайды Almaty.tv тілшісі Tengrinews.kz-ке сілтеме жасап.

2021 жылы Қазақстандағы барлық стационарлық ластаушы көзден шығатын зиян заттардың жалпы көлемі 34,3 миллион тонна болған, бұл 2020 жылмен салыстырғанда 3,3 пайызға аз. 31,9 миллион тонна зиян шығарынды залалсыздандырылған. 2021 жылы атмосфераға шыққан ластаушы заттар көлемі 2,4 миллион тонна болған, бұл 2020 жылмен салыстырғанда 1,4 пайызға аз.

Атмосфераға тараған зиян заттардың жартысы Павлодар (736 мың тонна) және Қарағанды (569 мың тонна) облыстарына тиесілі. Сондай-ақ Атырау, Қостанай және Ақтөбе облыстарында 100 мың тоннадан аса зиян шығарынды тіркелген.

Атмосфераға тараған 2,4 миллион тонна ластаушы заттардың 2,1 миллион тоннасы тек өнеркәсіп саласынан. Шығарындының ең көп көлемі жылу және электрмен жабдықтау сегментінде - 945,2 мың тонна. 728,1 мың тоннасы өңдеу өнеркәсібіне тиесілі. Сумен қамтамасыз ету, сондай-ақ қалдықтарды жинау, өңдеу және кәдеге жаратуда 47,8 мың тонна шығарынды тіркелген. Өнеркәсіптен басқа көлік және қойма шаруашылығы саласындағы кәсіпорындардан да ауаға зиян заттар шығады - 114 мың тонна.

2021 жылы атмосфераға шыққан газ тәрізді және сұйық ластаушы заттардың үлесі 79,6 пайыз немесе 1,9 миллион тонна болды. Оның ішінде күкірт диоксиді - 835,4 мың тонна, көміртегі тотығы - 473,2 мың тонна, азот оксиді - 322 мың тонна, көмірсутек - 133,2 мың тонна.